Törkiyä turizm sezonına äzerlänä

Yäşeren qultıqlar, altın tözendäge qomnar, zäp-zäñgär diñgez… Här yıl millionnarça turistnıñ yal öçen östenlek birüçe urınnarı. Tik bu üzenä tartıp toruçı cirleklär 2020nçe yılda Kovid-19 pandemiyäse turizm tarmağın böten dön'yada tuqtaw noqtasına kitergäç buşap qaldı. Xäzer isä çikläwlär betkännän soñ Törkiyä tulı turizm sezonı kiçerergä häm pandemiyädän aldağı kürsätkeçlärgä ireşergä teli.

Uolker Şeffer, turist:

• Hawa bik şäp, östäwenä biredä qıybat ta tügel. Keşelär igelekle häm yärdämçel. Biregä kilergä tırışabız, çönki korona waqıtında da bezneñ öçen problema bulmadı. İrekle räweştä xäräkät itä alabız, bu ilne şuña sayladıq.

Ukraina häm Rusiyä watandaşları Törkiyägä kilüçe turist sanınıñ çiregennän artığın täşkil itä. Tik bu ike däwlätneñ watandaşları, aralarında bäreleşlär däwam itkändä, Törkiyägä kilä alaçaqmı?

Sinan Kösäoğlu, "JW Marriott"nıñ ğomum mödire:

• Törkiyä ike il öçen dä iskitkeç turizm noqtası. Törkiyäneñ aradaşçılıq role säbäple 2022nçe yılda bik yaxşı näticälärgä ireşäçägebezgä ışanam. İke ildän dä turistlar kiläçäk.

Urta diñgezdäge kurort şähäre Antaliyadä otellär yaña sezonğa äzerlänä. Törle illärdän bik küp turist älege cirlekkä kilä başladı. Antaliyäneñ söykemlelege bormalı yarları buylap tezelgän zinnätle qunaqxanäläre belän küz qamaştıra. Tik anıñ qızıqsındıruçı yağı bu ğına tügel. Äñgämädäş turistlar Törkiyäneñ qunaqçıllığınıñ Urta diñgezneñ cäyge cılılığına turı kilüen söyli.

Mazen Louand, turist:

• Bigräk tä rizıqlar oşıy. Keşelärneñ bezgä mönäsäbäte dä. Här närsä iskitkeç, häm üzebezne öydä şikelle xis itäbez.

Aleksandra, turist:

• Törkiyägä altınçı tapqır kiläm. Antaliyağa monnan alda 3 tapqır kilgän idem. Klimatı bik oşıy, mondağı qunaqçıllıq, rizıqlar häm diñgez dä.

Kovid-19 pandemiyäse waqıtında 2 yılnı buş diyärlek kiçergän turizm tarmağı bıyıl tup-tulı sezon kiçerergä häm turistlarğa berqayçan da onıtılmayaçaq yal büläk itärgä ömetlänä.

Pol Montesil'o, TRT World, Antaliya