Ärdoğan NATO sammitınnan soñ belderülär yasadı

Törkiyä ilbaşı Räcäp Tayyip Ärdoğan Bel’giyäneñ başqalası Brüssel’dä NATOnıñ çirattan tış liderlar sammitınnan soñ matbuğat cıyılışında çığış yasadı.

“Awrupa däwlätlärennän başlap härkem işegenä kilgän möhacirlärgä yardam itärgä, qıyınlıqların ciñeläytü öçen cawaplılıq alırğa tiyeş,”-dide Törkiyä liderı.

Ärdoğan NATOnıñ xäzerge suğış moxitendä Ukrainağa säyäsi häm praktik yärdäm yasağanda realistik häm strategik qaraş belän êş itärgä tiyeşlegen belderde. Ul Törkiyäneñ ittifaq’ berdämlegen nigez itep alıp NATOnıñ qurqıtu häm saqlanu çaralarına öleş kertüne däwam itäçägen assızıqladı. 

“Berlektäşlärebezdän dä şunı uq kötäbez,”-dide ul.

 Ärdoğan törek saqlanu sänäğate êşlänmäläreneñ uñışı küz aldında buluın häm ilneñ bu tarmaqta oçraşqan kirtälärneñ bernindi aqılğa sıyışlı säbäbe yuqlığın belderde. “Saqlanu sänäğatebezneñ qarşısına qayber berlektäşlärebez tarafınnan quyılğan çikläwlärneñ beterelüe urtaq mänfäğatebez,”-dide ul. Ärdoğan äytkänçä, berlektäşlär arasında açıq yäisä yäşeren êmbargolar ğamälgä aşırılu tügel, kön üzägenä dä kilmäskä tiyeş. Ul bu mäs’älädäge fikerlären liderlarğa citkerüen belderde.

Ärdoğan Rusiyä däwlät başlığı Vladimir Putin häm Ukraina ilbaşı Vladimir Zelenskiy belän söyläşülärne däwam itäçäklären assızıqladı. Ul ike lidernı oçraştırıp solıx atmosferasın tudırırğa ömetlänülären äytte.  “Soñğı çişeleşneñ Rusiyä, Ukraina häm xalıqara cämäğat’çelek qabul itäçäk ışanıçlı formulağa nigezlänergä tiyeşlegen uylıybız,”-dide Törkiyä ilbaşı.