Çavuşoğlu: “Rusiyäneñ Ukrainağa höcüme barı tik Awrupada ğına tügel, dönyada küp närsäne üzgärtäçäk”

Çavuşoğlu Antaliyada oyıştırılğan 8nçe İstanbul aradaşçılıq konferenśiyasınıñ yuğarı däräcäle açılış utırışında çığış yasadı.

Bıyılğı konferenśiyanıñ Antaliya diplomatiya forumınnan soñ uq ütkärelüenä iğ’tibarnı yünältüçe Çavuşoğlu: "Monıñ maqsatı – ike zur çara arasında sinergiya urnaştıru. Antalya diplomatiya forumınıñ bıyılğı teması “diplomatiyanı yañadan kodlaw”. Diplomatiya – kileşü yaqlı çişeleşlär tabu säläte häm köçne tıya aluçı sänğät”, - dip äytte.

Rusiyäneñ Ukrainağa höcümeneñ barı tik Awrupada ğına tügel, dönyada küp närsäne üzgärtäçägenä basım yasawçı Çavuşoğlu: “Bäreleşlär dönya külämendä kübäyä başladı. Yaqınça 2 milliard keşe bäreleş töbäklärendä yäşi. Bäreleşlär tağın da qatlawlı xälgä äylänä. Qızğanıç, xalıqara sistema yaña sınawlarğa häm üzgärgän iminlek qısasına yaraqlaşa almıy. Monı töğäyen bularaq Ukrainadağı qorallı bäreleşlärdä tağın ber qat küräbez”, - dip belderde.

"Bäreleşlärneñ totqarlanuı, täwäkkällek, aradaşçılıq biredä motlaq räweştä üz urının alırğa tiyeş”, - dip iskärtep uzuçı Mäwlüt Çavuşoğlu: "Çönki suğışnıñ üzqıymmäte härwaqıt tınıçlıq bäyäsennän tağın da zurraq. Çönki suğışnıñ ciñüçese, tınıçlıqnıñ yuğaltuçısı yuq”, - dip äytte.

Törle geografiyalardan bäreleş çişeleşe häm aradaşçılıq mäs’älälärendä äydäp barğan liderlarnı, diplomatlarnı, belgeçlärne, xalıqara oyışma wäkillären, uqıtuçı-ğalimnärne häm töşençä oyışmaların cıyğan "Aradaşçılıq konferenśiyası" 2012nçe yıldan birle ütkärelep kilä.

Konferenśiya bıyıl 3 tışqı êşlär ministrı, 2 ğomum särkätip, 6 xalıqara oyışmadan 10 maxsus wäkil, 80 uqıtuçı-ğalim häm dönya külämendäge 25 töşençä oyışması, barlığı 40tan kübräk ildän 200 tiräsendä delegat qatnaşuında uza.