Akar: “Rusiyä-Ukraina kiyerenkelegen yaqınnan küzätäbez”
Törkiyä Milli saqlanu ministrı Hulusi Akar Rusiyä belän Ukraina arasındağı kiyerenkelek turında matbuğatta çıqqan xäbärlärgä saqlıq belän qararğa kiräk buluın belderde
Akar Germaniyada Myunxen iminlek konferenśiyasında qatnaşqannan soñ jurnalistlarğa bäyäläwlär yasadı.
Rusiyä häm Ukraina arasındağı kiyerenkelekkä tuqtalıp uzuçı Akar: "Xörmätle İlbaşıbız Räcäp Tayyip Ärdoğan ike atna êlek wäkillek belän bergä Ukrainağa säfär yasadı. Däwlät başlığıbız Ukraina İlbaşı Vladimir Zelenskiy belän, bez dä wazıyfadaşlarıbız belän bik êçkersez söyläşülär ütkärdek. Täräqqıyätlärne yaqınnan küzätep torabız”, - dip äytte.
“Anda (Donbassta) xärbi xäräkätlelek bar. Bu xärbi xäräkätlelekneñ qayber näticäläre bar. Bu mäs’älädä matbuğatta çıqqan qayber xäbärlär bar. Bolarnı bik saqlıq belän bäyälärgä kiräk”, - dip basım yasawçı Akar: “Çönki qayber dezinformaśiya, yalğan xäbärlär turında süz alıp barıla. Bolar arqasında (Rusiyä-Ukraina arasında) telänmägän bertörkem xällärneñ barlıqqa kilüen totqarlarğa kiräk”, - dip belderde.
Törkiyäneñ NATO êçendäge böten cawaplılıqların uñışlı räweştä başqaruın iskärtep uzuçı Akar: "Qara diñgez buyındağı illärneñ anda uñaylıqta, qurqınıçsızlıqta häm mullıqta yäşäwe bezneñ iñ êçkersez telägebez. Bu cähättän (1936nçı yılda imzalanğan) Montrö (Buğazlar) kileşüeneñ möhim buluın, moña kiräkle yaqlawnıñ täêmin itelüeneñ zarurlığın, Montrö kileşüe salğan tärtipneñ böten taraflar öçen faydalı buluın da biredän citkerü forsatın taptıq”, - dip äytte.
