Ärdoğan “Dubai Expo 2020” Törkiyä milli könendä qatnaştı

İlbaşı Ärdoğan Berläşkän Ğaräp Ämirlekläre säfäreneñ ikençe könendä “Dubai EXPO 2020” Törkiyä milli köne çaralarında qatnaştı.

Ärdoğan biredä yasağan çığışında êkologiya häm sälamätlek saqlaw belän bergä dönya oçraşqan fälaqätlärneñ häm qarşılıqlarnıñ üzlären bergäläşep çişeleş êzläwgä êtärüen belderde.

Räcäp Tayyip Ärdoğan: "Böten keşelekneñ urtaq yäşäw mäydanı bulğan tirä-yaqnı saqlawnıñ räximlek tügel, burıç buluına ışanabız. “Keşene yäşät, däwlät yäşäsen” añlayışıbız moxitnı saqlawnı da üz êçenä alğan kiñ qırlı küzallawnı çağıldıra. Êkologiya säyäsätebezne, üseş säyäsätlärebezne näq’ menä şuşı anlayış belän alıp barırğa tırışabız”, - dip äytte.

Xäläl cefete Äminä Ärdoğannıñ ximayäsendä 2017nçe yılda başlatılğan “Nol’ qaldıq” proyektınıñ bu cähättän möhim ürnäk buluın belderüçe Ärdoğan: "Bu proyekt belän bügengä qadär 2 million tonnadan kübräk qaldıqlar êşkärtelep iq’tisadqa qazandırılğan, 3 million tonna parnik gazınıñ çığarıluı totqarlanğan, 265 million ağaç kiselüdän qotqarılğan ide”, - dip äytte.

Ärdoğan, Törkiyäneñ dönyada urman barlığın arttırğan siräk illär arasında buluına iğ’tibarnı yünältep: "Ayıruça Törkiyä bügen yañartıla alınğan ênergiya küät köçendä Awrupada 5nçe, dönyada 12nçe urında tora. Parij klimat kileşüen raslap, 2053 vizionıbıznıñ berençe maqsatı bulğan Yäşel üseş inqıylabın bilgelädek.

Bez moxitnı saqlawğa birgän ähämiyätneñ başqa ber bilgese bulğan Törkiyäneñ täwge êlektrlı avtomobile “TOGG”nı da biredä ayıruça äytep uzasım kilä. Kürgäzmä mäydanında maketın kürdegez häm aldıbızdağı yıl başında massaküläm citeşterügä uzaçaq “TOGG”nıñ moxitnı saqlawğa kertäçäk öleşe mäğ’lüm. Törkiyäneñ “EXPO”ğa “däwam itelerlek” sub-teması töbägendä qatnaşuı bu ölkädäge köçle torışıbıznıñ çağılışı.

Närsä genä bulmasın, bez üseş alunıñ, bayunıñ artınnan tügel, keşegä, tabiğatkä, moxitqa ixtiramlı üseş artınnan yöribez. Işanuıbıznıñ häm mädäniyätebezneñ bezgä kürsätkän yulı şuşıdır. Kürgäzmä mäydanıbıznıñ “śivilizaśiyälärneñ başlanğıç noqtasınnan kiläçäkne tözü” teması belän qorıluınıñ astında da şuşı añlayış yata”, - dip äytte.