Çavuşoğlu: “Härkem ülçäwle säyäsät alıp barırğa tiyeş”
Tışqı êşlär ministrı Mäwlüt Çavuşoğlu Rusiyä-Ukraina kiyerenkelege belän bäyle bularaq: "Töbäktä tınıçlıq buluın telibez ikän, härkem ülçäwle säyäsät alıp barırğa tiyeş”, - dip äytte
“TRT Xäbär” kanalı tapşıruında qunaq bulğan Çavuşoğlu Rusiyä häm Ukraina belän mönäsäbätläre yaxşı bulğan Törkiyäneñ töbäktä kiyerenkelekneñ azaytıluı öçen adımnarın däwam itüen belderde.
"Biredä mäs’älä iñ êlek kiyerenkelekneñ azaytıluı häm totrıqlılıq urnaştırıluı”, - dip äytüçe Çavuşoğlu: "Här tırışlıq qıymmätle, fäqät qayberäwläre “min dä bu êşneñ êçendä bar” dip äytü öçen yasalğan adımnar. Biredä samimiyätsezleklärne küräbez. Kiräksez açıqlawlardan da taypılırğa kiräk. Rusiyä bügen basıp alaçaq, irtägä yawlap alaçaq kebek açıqlawlar Ukrainada xozursızlıqqa säbäp bula. İq’tisadi bularaq ta Ukrainağa zarar birä. Şunı küräbez: çın küreneş bu tügel. Çın küreneştä kiyerenkelek barmı, bar, bäreleş ixtimalı barmı, bar, fäqät qayber könbatış illäre açıqlağan kebek megafon diplomatiyası belän söyläşergä kiräkmi”, - dip belderde.
Törkiyä aradaşçılığınıñ telgä alınuın äytüçe Çavuşoğlu Ukrainanıñ aradaşçılıqnı teläwen, Rusiyäneñ dä işekne yapmawın iskärtep uzdı.
Törkiyäneñ tırışularınıñ däwam itelüen citkerüçe Çavuşoğlu: "Aradaşçılıq räistäşlegen Berläşkän Millätlär Oyışmasında da, İslam xezmättäşlek oyışmasında da başqarabız. Biredäge cawaplılığıbıznı beläbez. Töbäk tigezlege xasil bula başladı ber yaqtan da. Töbäktä tınıçlıq häm xozur, iq’tisadi üseş telibez ikän, härkemneñ ülçäwle säyäsät alıp baruı kiräk. Mäğlüm, krizis bar, härkem qulınnan kilgänne êşlärgä tiyeş”, - dip belderde.
