Ärdoğan Albaniyägä kitä

Törkiyä ilbaşı Räcäp Tayyip Ärdoğan Albaniyä xökümäte räise Êdi Ramanıñ çaqıruına cawap itep bügen älege ilgä säfär qıla. Anda uzaçaq söyläşülärdä ike arada strategik xezmättäşlek däräcäsendäge mönäsäbätlär barlıq yaqları belän qaralaçaq, anı kiñäytü öçen yasalaçaq adımnar xaqında süz baraçaq. Monnan tış, regional’ häm xalıqara mäs’älälär xaqında fiker alışaçaqlar.

2019nçı yılda Albaniyädä bulğan cir teträwdä öyläre cimerelgän ğailälär öçen Törkiyä Lacı qalasında toraqlar tözede. Säfär qısalarında andağı fatirlarnı tapşıru tantanası da uzdırılaçaq.

İlbaşı Ärdoğannıñ Tiranada Törek xezmättäşlege häm koordinaśiyä agentlığı TİKA restavraśiyälägän Ätxäm bäy mäçeteneñ açılışında qatnaşuı häm Albaniya parlamentında çığış yasawı kötelä.