"Bezneň maqsat – ilebezne dön’yanıň iň êre 10 iq’tisadı arasına kertü”

Törkiyä ilbaşı Räcäp Tayyip Ärdoğan İstanbuldağı Dolmabahçe ofisında êkonomistlar häm akademiklar belän oçraşuda çığış yasadı.

Ul üz çığışında Törkiyäneň üz xakimiyäte waqıtında berençe tapqır yaqınça 20 yıllıq özleksez üseş prośessı kiçergänenä basım yasadı.

 İlbaşı monıň nigezendä  töp iq’tisadi adım yasaw öçen kiräk bulğan asqormanı zur külämdä tögälläwlären äytte.

Ärdoğan äytüençä, üzläre xakimiyätkä kilgän 2002 nçe yılda ilneň Xalıqara valyuta fondına (IMF) burıçı 23,5 milliard dollar bulğan häm alar bu burıçnı 2013 nçe yılnıň mayında tüläp betergännär.

“Xäzerge waqıtta IMF gä burıçıbız yuq, anıň belän êlemtädä tormıybız”,- dide ul.

Ärdoğan iq’tisadnıň torğızıluı belän Üzäk bankta valyuta rezervınıň 115 milliard dollardan artıp kitüen belderep, “Rezervlar tağın da yaxşı wäzğıyät’tä bulaçaq. Bezneň maqsat – ilebezne dön’yanıň iň êre 10 iq’tisadı arasına kertü” dide.

İlbaşı Ärdoğan: “Qısqa waqıt êçendä finans öleşendä balans urnaştırğanda kiläse cäy aylarında ilebezneň bötenläy başqa iq’tisadi atmosferağa kerüen kürerbez”,- dide.