Çavuşoğlu Rusiyä belän Ukrainağa tınıç bulırğa kiñäş itte
Tışqı êşlär ministrı Mäwlüt Çavuşoğlu Törkiyäneñ Rusiyä belän Ukrainağa tınıç bulırğa häm kiyerenkelekne kimetergä kiñäş itüen äytte
Çavuşoğlu Latviya başqalası Rigada oyıştırılğan NATO tışqı êşlär ministrları cıyılışınıñ ikençe kiçäge utırışlarına kerer aldınnan jurnalistlarnıñ sorawlarına cawap birde.
Ukrainanıñ NATO äğza’lege turındağı bäyäläwe soralğan Çavuşoğlu, Törkiyäneñ kiñäyüne yaqlawın belderep: "Xörmätle İlbaşıbız Räcäp Tayyip Ärdoğan da, bez dä NATO sammitlarında häm ministrlar cıyılışlarında moña basım yasıybız”, - dip äytte.
Çavuşoğlu: "Rusiyäneñ agressiv totışın niçek qarşılıysız?"sorawına isä: "Bez här ike taraf belän dä (Rusiyä häm Ukraina belän) êlemtädä torabız. Tınıç bulırğa häm kiyerenkelekne kimetergä kiñäş itäbez. Küptän tügel här ike ilneñ tışqı êşlär ministrları Sergey Lavrov häm Dmitri Kuleba belän söyläştem. Comğa könne İlbaşıbız Räcäp Tayyip Ärdoğan Rusiyä Däwlät başlığı Vladimir Putin belän söyläşäçäk. Min bügen Dmitro Kulebanı biredä, irtägä dä Stokgol’mda küräçäkmen. İrtägä Stokgol’mda ayıruça Lavrovnı küräçäkmen. Yäğ’ni här ike taraf belän êlemtädä torabız häm üzlärenä tınıç bulırğa häm kiyerenkelekne kimetergä kiñäş itäbez”, - dip cawap birde.
Çavuşoğlu Rusiyägä qarşı buluı mömkin sankśiyalar belän bäyle bularaq ta Törkiyäneñ çikläwlärneñ problemalarnı xäl itäçägenä ışanmawın, sankśiyalar urınına mäğ’näle waz kiçertüneñ zarurlığın belderep: "Törkiyä bularaq bez ışanğan närsä – tıyıp toru häm dialog arasında döres tigezlek. Ukrainağa yäki başqa ber ilgä berkem dä barı tik çikläwlär yulı belän genä yärdäm itä almas”, - dip iskärtep uzdı.
