"Qaçaqlar probleması Törkiyädän çığa” dip äytü - yaxşılıqnı añlamaw

Törkiyä ilbaşı Räcäp Tayyip Ärdoğan Greśiyäneñ Amerika Quşma Ştatlarınıñ bazası xälenä kilüen belderde. Ul räsmi säfär belän Änkarağa kilgän Vengriyä xökümäte räise Viktor Orban belän urtaq matbuğat cıyılışı uzdırdı. Ärdoğan oçraşuda xalıqara häm regional’ mäs’älälär xaqında fiker alışuların, säwdä äyläneşen 3 milliardtan 6 milliard dollarğa citkerü maqsatı quyuların äytte.  

“Törkiyä belän Awrupa Berlege mönäsäbätläreneñ ähämiyäten añlawçı, bezgä härwaqıt bu mäs’älädä kiräkle teräk buluçı xörmätle Orbanğa, Vengriyägä üz isememnän, millätemnän räxmät belderäm,”-dide Ärdoğan.  Ul Awrupa Berlegendä barlıq däwlätlärneñ dä Törkiyäne äğ’za itep alırğa äzer tormawına işarä itep, Greśiyä xökümäte räise Kiryakos Miçotakisnıñ belderüen tänqıyt’läde.

“5 millionğa yaqın möhacirne üzenä sıyındırğan, alarğa yäşäw mömkinlekläre birgän däwlät xaqında “qaçaqlar probleması Törkiyädän çığa” dip äytü yaxşılıqnı añlamaw,”-dide ilbaşı.

“Ägär bez işeklärebezne açsaq, Greśiyä nişlär, belmim. Annan da bigräk, Êgey, Urta diñgezdä möhacirlärneñ rezin köymälären tişep, alarnı ülem qoçağına atuçı il ul - Greśiyä. Qulıbızda barlıq dälillär bar,”-dip däwam itte Ärdoğan.  

Törkiyä ilbaşı AQŞnıñ Greśiyädäge Dädäağaç töbägendä tözegän bazasın da telgä aldı häm ilneñ başqa däwlätneñ xärbi bazası xälendä qaluın äytte.