Ärdoğan AQŞqa kitär aldınnan belderülär yasadı

Törkiyä ilbaşı Räcäp Tayyip Ärdoğan böten keşelekkä yanawçı çaqırularğa qarşı Törkiyäneñ poziśiyäsen BMO ğomum şurası mönbärennän söyläyäçägen belderde. Ul Amerika Quşma Ştatlarına kitär aldınnan İstanbulnıñ Atatörek aêroportında matbuğat cıyılışı ütkärde.

Ärdoğan bıyılğı cıyılışnıñ koronavirus kizüen uzdırıp cibärü, totrıqlılıqnı qabat torğızu, keşe xoquqlarına xörmät häm BMOğa qabat can örü öçen nıqlıqnı buldıruğa bağışlanuın assızıqladı.

“Kön tärtibendä bez aldınğı rol’ uynıy torğan mäs’älälär – sälamätlek, klimat häm totrıqlı üseş östenlekle. Utırışlarnıñ berençe köne – 21nçe sentyabr’, sişämbe könne BMO ğomum şurasına möräcäğat’ itäçäkmen. BMOnıñ kön tärtibendä urın alğan töp mäs’älälärgä bäyle fikerlärebezne citkeräçäkmen,”-dide ilbaşı.

Ärdoğan migrantlar mäs’äläsendä dä dön’yağa çaqıru yasayaçaqların belderde.

“Säfärem qısalarında bik küp däwlät häm xökümät başlıqları belän ikeyaqlı söyläşülärem bulaçaq. Monnan tış, Törkiyä-Amerika milli idarä itü komitetı ütkäräçäk “Tağın da ğadel dön’ya bula ala” programmasında qatnaşaçaqmın. Törek yortı binabıznıñ açılışın mäğ’näle tantana belän tormışqa aşıraçaqbız,”-dip söyläde ilbaşı.

Ärdoğan AQŞta qayber matbuğat organnarı belän oçraşu häm interv’yular bulaçağın da äytep uzdı. “Törek häm Amerika êşmäkärläre belän söyläşülär bulaçaq. 11nçe Törkiyä investiśiyä konferenśiyäsendä qatnaçaqmın. Säfärebezneñ ilebez, millätebez häm böten keşelek öçen xäyerle näticälärgä säbäpçe bulaçağın telim,”-dide ul.