Maqsat - "Kanal İstanbul"nı 6 yılda tögälläw

Törkiyä ilbaşı Räcäp Tayyip Ärdoğan maqsatlarınıñ “Kanal İstanbul” proyektın 6 yıl êçendä tögälläp xezmät kürsätügä açu buluın belderde. Ul bu xaqta AK partiyäneñ Törkiyä Böyek Millät mäclesendä uzğan törkem cıyılışında söyläde.

Ärdoğan üz çığışında 19 yıl il belän icat häm xezmät säyäsäte nigezendä idarä itülären assızıqladı. Ul misalğa İstanbulda kütärelgän 3nçe aêroport, il külämendä tözelgän avtomagistral’lär, küperlär, şähär xastaxanälären kiterde.

İlbaşı êksportnı här ay yaña rekordlar belän alğa cibärülären, citeşterüne arttıruların, sänäğat’ne üsterülären, ilne saqlanu sänäğatendä brend xälenä kiterülären söyläde. Ul “Kanal İstanbul”nı da Törkiyägä şul uq räweşle tapşıraçaqların äytte.  

“Dön’yadağı iñ zur şähärlärneñ berse bulğan İstanbulnıñ Bosfor buğazındağı transport xäräkäte häm cir teträwlärgä äzerlek şikelle mäs’älälrneñ çişeleşenä citdi öleş kertäçäk bu proyektnı şähärneñ kiläçägen qotqaraçaq äsär bularaq küräbez. Bez monda barı tik ber kanal tözep kenä qalmıybız, ber ük waqıtta İstanbulğa, ilebezgä portı belän êksportıbıznı, tormış mäydannarı belän keşelärebezne räxätländeräçäk yaña sulış yulı açabız,”-dip söyläde Ärdoğan.