Törkiyä belän AQŞ arasındağı 3 "qara mäçe"...

Törkiyä ilbaşı idaräse süzçese İbrihim Kalın Rusiyädän satıp alınğan S-400 hawa saqlanu sistemasınıñ NATO sistemasına integraśiyälänmäyäçägen belderde. Ul “Bloomberg”qa interv’yusında Törkiyä häm Amerika Quşma Ştatların bülgän iñ ähämiyätle 3 mäs’älä xaqında söyläde. Bolar: AQŞnıñ PYD/YPG terrorçılıq oyışmalarına yärdäm itüe, S-400 saqlanu sisteması belän sankśiyälär häm Fätxullaxçı terrorçı oyışması atamanınıñ AQŞta yäşäwenä röxsät birelü.

Kalın älege mäs’älälärdä, qızğanıçqa, bernindi alğa kiteş häm adım yasaw bulmawın belderde. Bolar - Törkiyäneñ milli iminlek borçularınıñ nigezen täşkil itä.  

İbrahim Kalın äytüençä, problemalar dialog yulı belän bik açıq häm samimi räweştä söyläşep xäl itelergä mömkin.  “AQŞ säyäsätçeläreneñ bu mäs’älälärneñ bezneñ öçen niqadär möhim buluın añlawı kiräk,”-di ul.

Kalın Rusiyädän S-400 raketa saqlanu sistemaları satıp alu qararınıñ ber kiçtä çığarılmawına iğ’tibarnı cälep itte.

“Qulıbızdağı S-400lär NATO saqlanu sisteması belän  integraśiyälänmäyäçäk häm ittifaqnıñ saqlanu sisteması öçen yanaw barlıqqa kiterä torğan poziśiyädä bulmayaçaq,”-dide süzçe.

Kalın ikençe S-400 paketı belän bäyle sorawğa bolay cawap birde: “Berençe kileşüneñ prośessı däwam itä häm barısı da anıñ öleşe. Şul uq kileşüne törle êtaplarda başqaru belän bäyle söyläşülär bara”.

Kalın Törkiyäneñ AQŞ “Patriot”larınnan tış, Franśiyä-İtaliyä bergä çığarğan SAM/T raketaların da alığra teläwen xäterlätte.

“Ämma Franśiyä, Süriyäne sıltaw itep, bu prośessnı kirtäläw qararı çığardı. Franśiyä belän bu êşne tizlätü öçen söyläşülär däwam itä. Bez törle yullarnı sınap qarıybız,”-dide Törkiyä ilbaşı süzçese.

İbrahim Kalın AQŞnıñ yaña idaräse belän dä êlemtälär urnaşuın äytte. “İlbaşı Djo Baydennıñ bik küp êçke säyäsät mäs’äläläre belän mäşğul’ buluın yaxşı beläm. Bez wazıyfadaşlarıbız belän êlemtälär urnaştırdıq häm bu yaxşı başlanğıç. İlbaşı belän dä, hiçşiksez, söyläşäçäkbez,”-dide ul.