Ärdoğan ozaq waqıttan soñ täwge tapqır Makron belän söyläşte

Törkiyä ilbaşı Räcäp Tayyip Ärdoğan Franśiyä däwläte başlığı Êmmanuêl’ Makron belän videoêlemtä aşa söyläśte. Anda ikeyaqlı mönäsäbätlär häm Törkiyäneñ Awrupa Berlege belän bäğ’lanışları xaqında süz bardı.

İlbaşınıñ cämäğat’çelek belän êlemtä idaräsennän belderülärençä,  Ärdoğan Franśiyä liderı belän ozaq waqıttan soñ qabat söyläşülären häm üz isemennän franśuz xalqın sälamläwen citkergän. Ul ike il arasında citdi xezmättäşlek mömkinlekläre buluına ışanuın äytä.

Ärdoğan Franśiyäneñ koronavirus belän köräşen yaqınnan küzätep baruların da assızıqladı. “İlem häm millätem isemennän kizüdä ğomere özelgän Franśiyä watandaşları öçen qayğığıznı urtaqlaşam,”-dide ul.

İlbaşı Ärdoğan Törkiyädä vakśinalaştırunıñ bik tığız räweştä baruın, kontrol’ astında ğadäti tormışqa kire qaytu adımnarın yasıy başlawların söyläde. Ul yaqınça 10 million keşegä vakśina qadaluın da äytte.

Ärdoğan bıyıl Änkara kileşüeneñ 100 yıllığı ikänen xäterlätte häm Törkiyä häm Franśiyä mönäsäbätlärendä liderlar arasında alıp barılğan dialognıñ härwaqıt zur role buluın äytte. “İke köçle NATO berlektäşe bularaq Awrupadan Kavkazlarğa, Urta Aziyägä häm Afrikağa suzıluçı kiñ geografiyada iminlek, totrıqlılıq häm solıx tırışlıqlarına ähämiyätle öleş kertä alabız. Watandaşlarıbıznıñ ğomere häm mölkätenä yanawçı terrorçı oyışmalar belän köräştä bergä yasıy ala torğan adımnar bar,”-dide Törkiyä ilbaşı.