Törkiyädän AQŞqa yärdäm
AQŞqa mediśina yärdäme iltüçe xärbi yök oçqıçı başqala Änkaradan kütärelde
Törkiyäneñ koronavirustan iñ zur zarar kürüçe illärneñ berse – AQŞqa mediśina yärdäme iltüçe xärbi yök oçqıçı başqala Änkaradan kütärelde. Alarğa ilbaşı Räcäp Tayyip Ärdoğan kürsätmäse belän xirurg bitlege, bitne saqlawçı kozıryek, N95 bitlege häm kombinezon şikelle kiräk-yaraqlar cibärelä.
Yärdämnärne milli saqlanu häm sälamätlek saqlaw ministrlıqları xäzerläde. Alar A 400M törendäge yök oçqıçına quyıldı. Qaplarnıñ östenä 13nçe ğasırda yäşägän fiker iyäse Mäwlana Cälaletdin-i Ruminıñ “Ömetsezlek artında niqadär ömetlär bar. Qarañğılıq artında niqadär qoyaşlar bar” süzläre törek häm ingliz tellärendä yazılğan.
AQŞnıñ Änkara ilçese Törkiyägä räxmäten citkerde. Ul cibärgän yullamada şundıy yullar bar: “AQŞ xökümäte isemennän NATO berlektäşebez Törkiyägä bügen cibärgän medikal’ êşlänmälär häm başqa kiräkle materiallar tulı yumart büläge öçen räxmät belderäm. Bu adım şunı kürsätä: AQŞ belän Törkiyä arasında mönäsäbät köçle häm bu iñ ähämiyätle al’yanslarıbızdan berse. Törkiyä belän bu mäs’älädä häm bik küp başqa urtaq mänfäğat’lärebezdä xezmättäşlekne däwam itterüne sabırsızlanıp kötäbez”.
Törkiyä qorallı köçläreneñ A 400M yök oçqıçları monnan alda İtaliya, İspaniya, Makedoniya, Karataw, Serbiya, Bosniya-Gerśegovina, Kosova, Angliya häm Somaliğa yärdäm iltte.
Bäyläneşle xäbärlär
Ğıyraqtan şähit xäbäre
Ğıyraqnıñ tön’yağındağı “Pänçä-Kilit” operaśiyäse töbägendä ber ğaskäri şähit bulğan