Çanakkale cir öste suğışlarınıñ 105 yıllığı yullaması

Törkiyä ilbaşı Räcäp Tayyip Ärdoğan Çanakkale cir öste suğışlarınıñ 105 yıllığı uñayınnan yullama yasadı. Anda watannı häm bayraqnı saqlağan ğaskärilärneñ qaharmanlığı häm xalıqnıñ fidaqar’lege räxmät belän iskä alındı, şähitlär häm baqıylıqqa küçkän veterannar qarşında baş iyelde.  

“Xalqıbız öçen Çanakkale ruxı iñ awır şartlarda da cıyılışıp basıp aluçılarğa qarşı kütärelü, bäysezlek öçen köräşü, uñışqa ışanu, ber häm berdäm bulıp maqsatqa taba barunı añlata,”-dide Ärdoğan. Ul borınğıdan birle irekle yäşäwçe millätneñ bernindi suğış häm höcüm belän qamawğa röxsät birmäwen, birmäyäçägen belderde.

Ärdoğan yullamasında bolay dide: “Tarixıbız buyınça maqsatıbız härwaqıt bäysezlegebezne saqlaw häm tınıçlıqnı torğızu buldı. Barlıq awırlıqlar häm qıyınlıqlarğa qaramastan, suğış, terrorçılıq, dähşät urınına solıx, xozur häm keşelek qıymmätlären torğızğanğa qadär bu köräşne alıp baru qararıbız nıq. Çanakkale cir öste suğışlarınıñ 105 yıllığı uñayınnan böten dön’yağa solıx çaqıruıbıznı yañartabız. Bez yaña suğışlarnıñ bulmawı häm tınıçlıqnıñ xakimlek itüe öçen tırışqanda, kiläse buınnarnıñ Çanakkale birgän yullamalarğa barlıq şartlarda da tuğ’rı qaluın kötäbez.”

İlbaşı Ärdoğan ğazi Mostafa Kemal Atatörektän başlap Çanakkaledä zur köräş alıp barğan barlıq qaharmannarnı xörmät belän iskä aldı.