"Ramazannan soñ ğadäti tormışqa kire qaytaçaqbız"

Törkiyä ilbaşı Räcäp Tayyip Ärdoğan ilneñ global’ däräcädä baruçı ber prośessnıñ üzägendä buluın äytte. Ul AK partiyäneñ videoêlemtä yulı belän ütkärelgän cıyılışında çığış yasap koronavirus belän köräş barışı xaqında söyläde.  

“Asılında sälamätlek probleması bulğan bu kizü iq’tisadi näticäläre nisbätennän İkençe Bötendön’ya suğışınnan soñğı iñ zur krizisqa äwerelde. Bigräk tä, alğa kitkän illärneñ mondıy külämle krizis qarşında çarasız qaluları kiläçäkne küzallawnıñ ör-yañadan uylanıluı kiräklegen mäcbüri qıla,”-dip söyläde Törkiyä ilbaşı.  Ul böten Awrupanıñ häm İran şikelle kizüne awır kiçergän däwlätlärneñ yanındağı Törkiyäneñ bu prośess tışında qaluı mömkin bulmawın assızıqladı. “Ämma bezne başqa däwlätlärdän ayırıp torğan närsä – köçle sälamätlek saqlaw asqormasına iyä buluıbız häm kiräkle çaralarnı waqıtında kürüebez,”-dide Ärdoğan.

Ul Törkiyäneñ İkençe bötendön’ya suğışınnan soñ täwge tapqır global’ üzgärtep qoru prośessı üzägendä urın alu forsatın qulğa töşerüen citkerde.  “Kizüdän soñ dön’yada, regionda häm ilebezdä barlıqqa kiläçäk yaña wäzğıyät’kä äzer bulu – kizü belän köräş qadär ük ähämiyätle,”-dip söyläde Törkiyä ilbaşı.

Ärdoğan Ramazan ayı buyınça da kisätü çaraların cirenä citkerep ütärgä kiräklegen belderde. “İnşallah, Uraza ğayetennän soñ ilebezne ğadäti tormışqa qaytaru maqsatı quyabız,”-dide ul.