Ärdoğan belän Putin 5nçe martta oçraşırğa mömkin
Aldan äytelgän 4 yaqlı urınına 2 yaqlı sammit uzdırırğa niyätlänä
Törkiyä ilbaşı Räcäp Tayyip Ärdoğan Rusiyä däwlät başlığı Vladimir Putin belän 5nçe martta İstanbulda oçraşu ixtimalı turında belderde. Anıñ äytüençä, Süriyäneñ İdlib töbäge mäs’äläsen 4 yaqlı sammitta qaraw äle tögäl tügel. İsegezgä töşeräbez, anda Törkiyä, Rusiyä Franśiyä häm Germaniyä liderları qatnaşırğa tiyeş ide. Ämma Vladimir Putinnan: “Monı ikebez genä uzdırsaq tağın da urınlı bulır,”-digänräk täq’dim kilgän. Ärdoğan da bu fikerne yaqlıy. “Xäzerge waqıtta İdlibtä ikebezneñ qararı bik zur ähämiyätkä iyä,”-di ul.
Ärdoğan başqala Änkarağa kilgän Rusiyä delegaśiyäse belän älege temağa söyläşülärneñ däwam itüen assızıqlıy. “Bu êşçe törkemnär arasındağı söyläşüneñ näticäsenä qarap telefon diplomatiyäsen däwam itäçäkbez,”-di Törkiyä ilbaşı.
Ärdoğan Törkiyä belän Rusiyä arasında 2018nçe yılda tözelgän Soçi kileşüeneñ cirenä citkerelü kirägen dä xäterlätä. Ul Bäşşar Asäd rejimı köçläre tarafınnan törek xärbi noqtaların qamawğa röxsät birmäyäçäklären äytä.
Törkiyä liderı AQŞ däwlät başlığı Donal’d Trampnıñ monnan alda yärdäm süze birüen, ämma älegä ul yärdämneñ kilmäwen häm Tramp belän tağın ber qat söyläşäçägen äytä.
“Xäzergä AQŞnıñ bezgä biräse Patriot hawa saqlanu sisteması kürenmi. Bez täq’dimebezne yasadıq. Ägär cibärsägez, bez sezdän Patriotnı alırbız didek,”-dip söyli Ärdoğan.
