Törkiyägä çit illärdän qayğınamälär häm şifa teläkläre

Tön'yaq Kipr Törek Cömhüriyäte İlbaşı Mustafa Akıncı yullamasında Törkiyädä barlıqqa kilgän Älazığ êpiśentrlı cirteträwdä can yuğaltularnıň häm yaralanuçılarnıň buluına bik borçıluın citkerde.

İlbaşı Akıncı: "Üzem häm Kipr törek xalqı isemennän ğomere özelgän qardäşlärebezgä Allahıdan yarlıqaw, isän qaluçılarğa häm böten törek millätenä, qayğıların urtaqlaşıp, sabırlıq telim”, - dip belderde.

Greśiya Baş ministrı Kiryakos Miçotakis, Törkiyäne teträtkän cirteträwdän soň İlbaşı Räcäp Tayyip Ärdoğan häm törek xalqı belän çın küňeldän teläktäşlek êçendä buluların assızıqlap, êzläw häm qotqaru törkemnäreneň yärdämgä äzer buluın belderde.

Tışqı êşlär ministrı Nikos Dendias ta törek wazıyfadaşı Mäwlüt Çavuşoğluna yärdämgä äzer buluların citkerde.

Kosova İlbaşı Haşim Thaçi, yöräkläreneň Älazığdağı cirteträwdä ülüçelärneň ğailäläre häm yara aluçılar belän bergä buluın assızıqlap: "Kosova bu faciğale mizgellärdä Törkiyä xökümäte häm xalqınıñ yanında. Kosova aşığış operaśiya yärdämen cibärergä äzer”, - dip äytte.

Bosniya-Hersegovina İlbaşı şurasınıň Bosniyalı äğ’zase Säfik Dzaferovic cirteträw arqasında İlbaşı Räcäp Tayyip Ärdoğanğa cibärgän qayğınamäsendä: “Doğalarıbız belän törek xalqınıň yanında bez," – dip şifa teläklären dä citkerde.

Tön’yaq Makedoniya Däwlät başlığı Stevo Pendarovski, Törkiyäneň qayğısın urtaqlaşıp, törek xalqı belän teläktäşlek êçendä buluların belderde.

Albaniya Baş ministrı Edi Rama: “Allahtan il räsmilärenä häm İlbaşı Ärdoğanğa bu tragediyanı xäl itä alırlıq köç birüe öçen doğa itäm,”- dip fikerläre belän urtaqlaştı.

Meksika xökümäte belän Boliviya, Êkvador, Kolumbiya, Peru häm Çilidän torğan AND Parlamentı zilzilädä häläq’ buluçılar öçen Törkiyäneň qayğısın urtaqlaştı.

Awrupa Berlege tışqı mönäsäbätlär häm iminlek säyäsäte yuğarı wäkile Xosep Borrell: "Töşençälärebez törek xalqı, qorbannarnıň ğailäläre, yaralanuçılar häm zarar kürüçelär belän. Yaqınnan küzätep torabız. Törek xalqı belän tulı teläktäşlek eçendä bez”, - dip äytte.

Awrupa Berlegeneň Törkiyä delegaśiyası isä, cirteträwdän täêsirlängän härkemgä şifa teläklären citkerep häm ülüçelärneň ğailälärneň qayğısın urtaqlaşıp: “Awrupa Berlege Törkiyäneň yanında”, - dip belderde.

Malayziya Baş ministr urınbasarı Wan Azizah Wan İsmail da Malayziya xalqınıň şuşı awır waqıtta Törkiyä xalqınıň yanında buluın häm härtörle yärdämgä äzer buluın citkerde.