"Terrorçılar çigenmäsä - xäräkät qabat başlanaçaq"

PKK/YPG/PYD terrorçıları 120 säğat’ êçendä Süriyäneñ tön’yağın buşatmasa, “Solıx çişmäse” xäräkäte tuqtalğan cirennän däwam itäçäk. Bu xaqta Törkiyä tışqı êşlär ministrı Mäwlet Çavuşoğlu Törkiyä rado-televideniye kompaniyäseneñ “TRT World - 2019” forumında söyläde. Çara İstanbul kongress üzägendä “Global’läşüneñ krizisı: xäweflär häm forsatlar” teması astında uza.

Ministr Çavuşoğlu, mondağı çığışındai Süriyädäge bäreleşneñ barı tik säyäsi räweştä çişelä alacağına ışanuların söyläde. Ul 360 meñnän artıq süriyäleneñ Törkiyädän üz watannarına, terrorçılardan çistartılğan cirlärgä kitülären äytte.

Çavuşoğlu AQŞ belän imin töbäk tözergä mataşuların, şul uq waqıtta, Amerikanıñ andağı terrıorçılarnı qoral belän täêmin itüdän tuqtamawın assızıqladı. Ul, berlektäşlärennän teläktäşlek kürmägäç, üzläre genä “Solıx çişmäse” xäräkäten başlarğa mäcbür buluların belderde.

“Solıx çişmäse” xäräkäte başlanğannan birle çınbarlıqnı çağıldırmawçı ğayeplär häm qara propaganda yasaluın küräbez. Bu törek-kört qarşılığı turındağı süzlär - yalğış. Körtlär bezneñ doşmanıbız tügel. Körtlärgä qarşı ayırım poziśiyäbez yuq. Ğıyraqnıñ tön’yağında da bik yaxşı mönäsäbätlärebez bar häm Törkiyädä 350 meñ süriyäle körtne sıyındırabız,”-dip söyläde ministr.

Monnan tış, ul törek xärbilären ximik qoral qullanuda ğayeplärgä mataşuların da äytte. “Tarixıbızda berqayçan da ximik qoral qullanmadıq. Bu da qara propaganda,”-dide Çavuşoğlu.

Ul irtägä Rusiyäneñ Soçi şähärenä barıp Rusiyä däwlät başlığı Vladimir Putin belän oçraşaçaqların häm monıñ bik ähämiyätle cıyılış bulaçağın söyläde.

Çavuşoğlu äytüençä, terrorçılarnıñ çigenüe öçen 30 säğat’ tiräse waqıt qaldı häm şul çor êçendä imin töbäkne buşatmasalar, xäräkät däwam itäçäk. 5 könlek tuqtap toru sişämbe könne Törkiyä waqıtı belän 22 säğat’tä tögällänä.