Ärdoğannıñ säfäre kiçekterelde

Törkiyä ilbaşı Räcäp Tayyip Ärdoğannıñ 23nçe-24nçe oktyabr’gä planlaştırılğan Paqıstanğa säfäre kiçekterelde. Bu xaqta älege ilneñ tışqı êşlär ministrlığı süzçese Möxämmät Faysal belderde. Anıñ äytüençä, däwlät başlığı Arif Alvi häm xökümät räise İmran Xan Törkiyä ilbaşı Ärdoğannı täwge tapqır qunaq itäçäk. Kiçekterelgän säfärneñ yaña waqıtın soñraq xäbär itäçäklär.

Faysal, forsattan faydalanıp, Törkiyäneñ Süriyädä alıp baruçı “Solıx çişmäse” xäräkäte belän bäyle belderü dä yasadı.

“Törkiyä terrorçılıqtan iñ küp awırlıq kürgän däwlätlärneñ berse buluı säbäple alarnıñ regional’ iminlek borçuların añlawıbız kiräk. Xökümät räise Xan da Ärdoğanğa şaltıratıp Paqıstannıñ bu mäs’älädäge teläktäşlegen citkerde,”-dide ul.  

Ärdoğannıñ säfäre xaqında uzğan ayda AQŞta uzğan BMO ğomum şurası waqıtında Paqıstan xökümäte räise İmran Xan beldergän ide.