Tramp Törkiyäne yaqlap çıqtı
Ul Aq Yorttağı çığışında töreklärneñ S-400 aluına qarşı kilä almawların belderde
Amerika Quşma Ştatları ilbaşı Donal’d Tramp Törkiyäne yaqlap çıqtı. Ul Aq Yortta S-400 hawa saqlanu sistemaları ala başlaw belän bäyle ministrlar kabinetı utırışında çığış yasadı.
Tramp anda êlekkege AQŞ ilbaşı Barak Obama çorında Törkiyägä Patriot hawa saqlanu sistemaların satmawların tänqıyt’lade. Ul şunnan soň töreklärneň S-400 aluğa yünälüen assızıqladı. Tramp Törkiyä belän älege temalarnı söyläşüen belderep bolay dide: “Döresen äytkända, Törkiya belän mönäsäbätlärebez bar, ämma bu wäzğıyät’ bik butalçıq. Obama idarase alarğa Patriot raketaların satmadı. Törkiyä bu sistemanı alu öçen bik tırıştı, ämma satmadılar. Şunnan soň Rusiyädän raketalar aldı. Annarı beznekelär kire uylap Törkiyägä “Yarar, sezgä Patriot satabız” dide, tik ul waqıtta Törkiyä inde Rusiyä belän kileşü imzalağan häm citdi külämdä tüläw yasağan ide. Törkiyä – NATO äğ’zası. 100dän artıq F-35 öçen zakaz birdelär, planda – tağın da kübräkne alu bar.”
Tramp üz çığışında Törkiyä ilbaşı Räcäp Tayyip Ärdoğan belän yaxşı mönäsäbättä buluın da belderde.
“Törkiyä bezgä qarata bik yaxşı uyda. Xäzer bez alarğa Rusiyädän raketa saqlanu sisteması alırğa mäcbür buluları öçen bu F-35lärne satmayaçağıbıznı söylibez. Alar bik awır xäldä qaldı, AQŞ bularaq bezneň dä xälebez yaxşı tügel. Xazer monı tözatü öçen êşlibez, nilär bulaçaq – qararbız,”-dip söylade AQŞ ilbaşı.
Tramp, monnan tış, älege wäzğıyät’tä F-35 oçqıçların çığaruçı şirkätneň qanäğat’ bulmawın da aytte. Çönki alar öçen bu meňnarçä keşeneň êş yuğaltuı digän süz.
