Çavuşoğlu Ğıyraqta
Ul älege ilneñ tışqı êşlär ministrı belän oçraştı
Törkiyä tışqı êşlär ministrı Mäwlet Çavuşoğlu ilbaşı Räcäp Tayyip Ärdoğannıñ yıl axırında Ğıyraqqa baraçağın belderde. Ul älege ilneñ tışqı êşlär ministrı Möxämmät Ali äl-Xäkim belän Bagdadta oçraştı. Soñınnan alar urtaq matbuğat cıyılışı ütkärde.
Çavuşoğlu wazıyfadaşı Xäkim belän Törkiyä häm Ğıyraq arasındağı ikeyaqlı mönäsäbätlärne här’yaqlap tikşerülären häm regional’ mäs’älälärne urtağa salıp söyläşülären belderde.
Tağın ber urtaq tema - ğıyraqlılarnıñ öylärenä qaytuı. Çavuşoğlu Törkiyäneñ bu mäs’älädä Ğıyraqqa teläktäşlek kürsätüen äytte.
Törkiyä Musul häm Basra konsullıqlarınnan soñ Näcäf häm Kärküktä dä diplomatik wäkilleklär açarğa teli.
Çavuşoğlu äytüençä, bıyıl Ğıyraq ilbaşı Bärxäm Salixnıñ Änkarağa säfäre waqıtında quyılğan qararlarnı tormışqa aşıru öçen bergäläp êşçänlek alıp barıla. Tizdäna ilneñ xökümät räise Adil Abdulmäxdineñ dä Törkiyägä kilüe kötelä. Monnan tış, bıyıl axırına taba ilbaşı Räcäp Tayyip Ärdoğan 4nçe Yuğarı däräcäle strategik xezmättäşlek şurası cıyılışında qatnaşu öçen Ğıyraqqa barırğa planlaştıra.
