"S-400 hawa saqlanu sisteması tulısınça Törkiyä kontrolendä bulaçaq"

Tışqı êşlär minstrı Mäwlet Çavuşoğlu Rusiyädän alınaçaq S-400 hawa saqlanu sistemasınıñ tulısınça Törkiyä kontrolendä bulaçağın häm anıñ NATO sistemalarına häm F-35 xärbi oçqıçlarına bernindi dä yanaw tudırmayaçağın tağın ber qat assızıqladı. Ul NATOnıñ tözelüenä 70 yıl tulu uñayınnan AQŞnıñ başqalası Vaşingtonda uzuçı çaralarda qatnaşa. Oyışmağa kerüçe illärneñ tışqı êşlär ministrları cıyılışınnan soñ Çavuşoğlu törek jurnalistları belän oçraştı.

Ministr anda AQŞ däwlät särqatibe Mayk Pompeo belän söyläşüe xaqında mäğ’lümat citkerde. Äñgämädä Amerika xärbiläreneñ Süriyädän çığuı häm älege ilneñ tön’yağında tözelergä tiyeşle imin töbäk mäs’äläläre qaralğan. Älbättä, könüzäk temalar - F-35 oçqıçları häm S-400 hawa saqlanu sistemaları da çittä qalmağan. Çavuşoğlu äytkänçä, AQŞ belän Törkiyäneñ älege mäs’älälärdä fikerläre ayırıla.

Ministr Törkiyäneñ küp taraflı tışqı säyäsät alıp baruın belderde. “Regionda bez Rusiyä belän kürşelär häm bu tirädäge här il annan tabiğıy gaz ala. Rusiyä bezneñ säwdä urtağıbız. AQŞ bezneñ NATO berlektäşebez. NATOnıñ könçığıştağı häm Qara diñgezdäge barlıq çaralarına teläktäşlek kürsätäbez. Härkem belän yaxşı mönäsäbätlär qorırğa häm monıñ balansın saqlarğa telibez. Tulısınça ber yaqnı ğına saylaw mäcbüri tügel,”-dip söyläde Çavuşoğlu.

Ul S-400ne alu häm AQŞnıñ älege kileşüneñ tögällängän buluına reakśiyäse xaqındağı sorawğa da cawap birde.

“Bu mäs’älädä borçular bulsa, niçek beterä alabız? Bu S-400lärneñ tulısınça Törkiyäneñ kontrolendä bulacağın häm NATO sistemaları belän F-35lärgä bernindi yanaw tudırmayaçağın başınnan birle äytep kiläbez. Rusiyä belän berençe şartıbız da şuşı ide,”-dide Törkiyäneñ tışqı êşlär ministrı Mäwlet Çavuşoğlu.