Töreklär Äfğanstanda xatın-qızlarğa belem birä

Törkiyä xezmättäşlek häm koordinaśiyä agentlığı idaräse (TİKA) Äfğanstanda xatın-qızlarğa belem birä. Alar öçen törek tele häm hönärgä öyrätü kursları êşli. Älege proyektnı TİKAnıñ Mäzar-i Şärif ofisı belän Mädäniyät êşläre idaräse bergä başqara.

Bağlan töbäge Pul-u Xumru şähärendä oyıştırılğan kurslar xatın-qızlarnıñ sośial’ statusların üsterüläre häm ğailä iq’tisadına öleş kertülären maqsat itep quya. Alarğa tegü, çigü häm çäçtaraş hönäre neçkäleklären töşenderälär. Monnan tış, törek tele, uqu-yazu häm Qor’än kursları da däwam itä.

Hönärgä öyrätü kursları şähärdä 6 ay däwam itäçäk. Anda 300dän artıq xatın-qız belem ala.

Törkiyäneñ TİKA oyışması Äfğanstan külämendä mäğarif, sälamätlek häm başqa bik küp tarmaqta ähämiyätle proyektlar alıp bara.