Rumıniyädän Törkiyägä teläktäşlek

Rumıniyä Törkiyäneñ Awrupa Berlege öçen xälitkeç urtaq buluın häm ilneñ älege berlekkä äğ’zalığına teläktäşlek kürsätüen belderde.

Rumıniyä xökümäte räise Viorika Dançila Törkiyä ilbaşı kiñäşçese Fuat Oktay belän Buxarestta oçraştı. Küzgä-küz häm delegaśiyälär arasındağı söyläşülärdän soñ matbuğat cıyılışı oyıştırıldı. Anda Viorika Dançila ike ilneñ köçle mönäsäbätlären häm säwdä äyläneşe potenśialınıñ yuğarı buluın assızıqladı.

Ul 2011nçe yılda imzalanğan Törkiyä-Rumıniyä strategik xezmättäşlek kileşüeneñ ike yaqqa da mömkinleklär täêmin itüen äytte. Söyläşülärdä urtağa quyılğan proyektlar ike däwlätneñ dä mänfäğat’läre öçen uñay buluı telgä alındı.

Aprel’ ayında İstanbulda Urtaq iq’tisad häm säwdä komitetı cıyılışı häm şunnan soñ Karmak iq’tisad komissiyäse utırışı uzaçaq. Dançila monıñ öçen bik şat buluın söyläde. “İke däwlätneñ êşmäkärlären Törkiyä bazarında da, Rumıniyänekendä dä kübräk kürergä telibez. Monıñ qısalarında êş forumı oyıştırıluı öçen bez şat. Sälamätlek häm mediśina fännäre tarmağında xezmättäşlegebez däwam itä,”-dide ul.

Dançila oçraşuda Törkiyä-Awrupa Berlege mönäsäbätlären telgä aluların da äytte. “Awrupa berlegendä Rumıniyä häm Törkiyäneñ maqsatları turı kilä. Rumıniyäneñ anda çor räislege prośessı bik ähämiyätle. Törkiyä Awrupa Berlegeneñ xälitkeç xezmättäşe, Rumıniyä ilneñ berlekkä kerüenä teläktäşlek kürsätä. Törkiyä qanunsız migraśiyäne tuqtatu öçen 3 million yarımnan artıq qaçaqnı üzenä sıyındırıp ğadättän tış tırışlıq kürsätüen däwam itä,”-dip belderde Rumıniyä xökümäte räise.