Çavuşoğlu uyğırlarnı yaqladı
“Qıtaynıñ terrorçılıq belän köräş xaqın qabul itäbez, ämma terrorçılar belän ğayepsez keşelärne ayırırğa kiräklegen uylıybız”
Törkiyä tışqı êşlär ministrı Mäwlet Çavuşoğlu Qıtaynıñ Sinśzyan’-Uyğır avtonomiyäle töbägendä yäşäwçe uyğırlar häm başqa möselman törkemnärgä qarşı xoquq bozular turındağı xisaplarnıñ borçu tudıruçı buluın belderde. Ul BMOnıñ Jeneva ştab-fatirında uzuçı Keşe xoquqları şurasınıñ 40nçı utırışı açılışında çığış yasadı.
Çavuşoğlu Törkiyäneñ FETO, PKK/PYD/YPG häm DEAŞ şikelle bik küp yanaw belän ber ük waqıtta köräşüenä qaramastan, keşe xoquqlarına härwaqıt ähämiyät birüenä basım yasadı. Ul Qıtaynıñ Sinśzyan’ -Uyğır avtonomiyäle töbäge häm başqa cirleklärendäge şomlandıruçı waqıyğalarğa tuqtaldı. Ministr äytüençä, BMOnıñ rasa diskriminaśiyäsen beterü komitetı häm başqa xisaplardağı uyğırlar häm möselman törkemnärgä qarata keşe xoquqların bozu dälilläre teträndergeç.
“Qıtaynıñ terrorçılıq belän köräş xaqın qabul itäbez, ämma terrorçılar belän ğayepsez keşelärne ayırırğa kiräklegen uylıybız,”-dide Çavuşoğlu. Ul Qıtay dairälärenä möräcäğat’ itep, uyğırlar häm başqa möselman törkemnärneñ dini ireklären häm dön’yaküläm keşe xoquqların xörmät itülären soradı.
