Ärdoğan Soçida oçraşular ütkärä

Törkiyä ilbaşı Räcäp Tayyip Ärdoğan Süriyä temalı dürtençe öç’yaqlı sammitta qatnaşu öçen Soçida. Başta ul İran başlığı Xasan Ruxani belän küzgä-küz oçraştı. Söyläşü jurnalistlar öçen yabıq işeklär artında uzdı. Soñınnan açıqlanğança, Ärdoğan oçraşuda kiçä İranda bulğan terrorçılıq höcümendä ülüçelärneñ qayğısın urtaqlaşqan.

Sammit başlanğançı Ärdoğan Rusiyä däwlät başlığı Vladimir Putin belän dä oçraştı. Törkiyä ilbaşı andağı çığışında bolay dide: “Süriyädä imin töbäk fikeren milli iminlek borçularıbıznı çişärgä yardam itüçe däräcädä bez dä yaqlıybız. Moña Rusiyäneñ dä uñay qarawına söyenäbez”.

Ärdoğan terrorçı oyışmalar mäs’äläsen dä kütärde. “PYD häm YPG Münbiçtän häm Färatnıñ könçığışınnan çistartılmıyça Süriyäneñ cir bötenlege täêmin itelmäs. İdlibtä hawa kiñlegen qullanuğa bäyle xezmättäşlekne Afrin häm Färat qalqanı töbägendä dä qabatlaw bik ähämiyätle,”-dide ul.    

Rusiyä däwlät başlığı Putin isä bolay dide: “Törkiyä belän bergä Süriyädäge taraflar arasındağı dialogqa yaña tizläneş biräçägebezgä ışanam. Süriyädäge maqsatlarğa aktiv, külämle êşçänlek häm kileşü belän ireşä alabız. Törkiyä belän bergäläp Süriyädä ähämiyätle ara üttek”.