“Üterü boyırığın Soğud Ğaräbstanı xökümäteneñ räsmi zatları birüen bik yaxşı beläbez”

Törkiyä ilbaşı Räcäp Tayyip Ärdoğan Amerikanıñ “Vaşington Post” gazetına yazğan mäqaläsendä jurnalist Cämal Qaşıqçınıñ üterelüennän soñ Törkiyäneñ totışın anlattı.

Ärdoğan üz mäqaläsendä bolay dide:” Soğud Ğaräbstanınıñ Qaşıqçı cinayäte belän bäyle bik küp sorawlarğa cawap birüe zarur. Anı üterü boyırığın Soğud Ğaräbstanı xökümäteneñ iñ yuğarı däräcäle räsmi zatları birüen bik yaxşı beläbez. Patşa Sälmannıñ mondıy boyırıq birüenä ışanmıym”,-dide.

Ärdoğan Törkiyäneñ tırışlıqları näticäsendä Cämal Qaşıqçınıñ aldan planlaştırılıp wäxşilärçä üterelüen böten dönyanıñ öyränüen citkerde.

Törkiyä ilbaşı süzlären tübändägeçä däwam itterde:” Qulıbızdağı dälillärne Amerika Quşma Ştatları häm başqa berlektäşlärebez häm duslarıbız belän urtaqlaştıq. Riyad belän ozaq yıllar  däwam itkän duslığıbız bu cinayät’ne kürmämeşkä sabışu mäğ’näsenä turı kilmi. Beräw dä monnan soñ NATO berlektäşe cirendä mondıy cinayät’ êşläw turında uylamasın. Yuğisä monıñ näticäläre bik awır bulır. Soğud Ğaräbstanı räsmi zatlarınıñ ğadellek öçen tırışu urınına Qaşıqçı cinayäten yomıp qalu öçen tırışuları borçuğa sala”.

Soğud Ğaräbstanı jurnalistı Cämal Qaşıqçı 2 nçe oktyabr’dä räsmi êşlär öçen Soğud Ğaräbstanınıñ İstanbuldağı baş konsullığına kilgännän soñ yuğalğan ide.

İstanbul baş prokuraturası Qaşıqçını konsullıqa kerü belän buıp üterülären häm mäyetne kisäklärgä bülgäläp yuq itülären açıqladı.