Törkiyä S-400lärne tiz arada alırğa cıyına

İlbaşı Räcäp Tayyip Ärdoğan Rusiyägä zakaz birelgän S-400 raketa sistemasınıñ iñ qısqa waqıt êçendä alınacağın belderde. Bu xaqta ul Balıkäsirdä xärbi akademiyadağı çığarılış tantanasında söyläde. İlbaşı terrorçılıq belän köräştä yalğız qalğan Törkiyäneñ saqlanu sistemalarına ixtıyacı buluın assızıqladı. “Üzebezneñ iminlekne täêmin itü öçen kiräkle xärbi texnikanı bezgä birmädelär, aqçabız belän satıp ala almadıq, ämma terrorçı oyışmalarğa buşlay qoral cibärälär. Cirlärebezne saqlaw öçen al’ternativa êzläwebezgä dä qırın qarıylar. Bezneñ bu tördäge qısrıqlawlarnı qabul itüebez mömkin tügel. Törkiyäneñ S-400lärgä ixtıyacı bar häm kileşü tözelgän, inşallax tizdän alaçaqbız,”-dide Ärdoğan. Ul Törkiyäneñ Awrupa häm Amerika belän berlektäşlek, urtaqlıq mönäsäbätläre şikelle ük başqa illär belän dä xezmättäşlekkä ixtıyacı buluın assızıqladı. İlbaşı AQŞta Törkiyägä qarata açılğan däğ’walar, çığarılğan xökem qararlarınıñ ürnäge başqa ber däwlättä dä bulmawın assızıqladı.  “Bezne ber’yaqlı mönäsäbätlärgä mäcbür itüçelärneñ üzläreneñ dön’yada yäşeren häm açıq räweştä nindi çaralar oyıştırıp yatuların beläbez. Moña qadär ikeyaqlı yäisä küp yaqlı mönäsäbätlärneñ bersendä dä süzebezne totmıyça qalmadıq. Berkemgä qarata ikeyözle bulmadıq. Ämma bezgä barısı da êşlände,”-dide Ärdoğan üz çığışında.