Kön'yaq Afrikada Törkiyäneñ ilçelege açılışı

Ärdoğan 10nçı Braziliya - Rusiyä - Hindstan - Qıtay - Kön’yaq Afrika sammitı öçen Yoxannesburgka kitte. Anda ul Törkiyäneñ Pretoriya ilçelege kanśelyariyäse binasının açılış tantanasında qatnaştı. Ärdoğan üz çığışında Törkiyäneñ Afrika qıytğasındağı ilçelek sanınıñ 41gä citüen belderde. 2002nçe yılda ul 12 ide. “Qaydan qaya kilüebezne kürsätü maqsatınnan bu bik ähämiyätle. Bügen dön’yaküläm mäs’älälärdä süze, üzen totışı qızıqsınu uyatqan Törkiyä bar ikän, bu soñğı 16 yılda birelgän küp’yaqlı tırışlıqlarnıñ näticäse. Xäzerge waqıtta dön’yada artta qalğan illärgä yardamda 8,2 milliard dollar belän Törkiyä berençe rätlärdä,”-dip söyläde ilbaşı.

Ärdoğan üz çığışında terrorçılıq belän köräşne dä telgä aldı. Anın fikerençä, terrorçı oyışmalar arasında bernindi ayırma yuq. “İseme, tele, imidjı nindi bulsa - bulsın, terrorçı oyışmalarnıñ barısı da keşelekneñ doşmanı. DEAŞ närsä bulsa - FETO şul.  PKK nindi bulsa - Boko Xaram, Äl Şäbab şundıy uq,”-dide Ärdoğan.  

FETOnıñ iñ aktiv bulğan illärneñ berse - Kön’yaq Afrika. Ärdoğan bu wäzğıyät’ne biredäge citäkçelek belän qabat söyläşäçägen belderde. “15nçe iyül’dä bezneñ başıbızğa bäla bulğan terrorçı oyışma irtägä Kön’yaq Afrikanıñ da başına bäla kiterer. Monı islärenä töşeräm. FETOnıñ bu tufraqlarnı pıçratuına, bu urınnı baza xälenä kiterüenä, duslarıbıznıñ yumartlığın qullanularına röxsät itmäyäçäkbez,”-dide ul.