Törkiyädä uqığan fälästinlelär iftarda oçraştı

İzrail’ tarafınnan basıp alınğan Yordannıñ könbatış yarında häm Gazzädä Törkiyä universitetların tögällägän fälästinlelär öçen iftar aşı ütkärelde. Çaranı Qudüs Yunus Ämrä törek mädäniyäte üzäge oyıştırdı. İftar aşın Ramallax şähärendäge törek restoranı äzerläde. Anda Törkiyäneñ Qudüstäge konsullığı wäkilläre, Fälästin êlemtä ministrı Allam Musa, Qudüs Yunus Ämrä törek mädäniyäte üzäge mödire Furkan Özdämir, Törkiyädä uqığan  fälästinlelär cämğıyäte räise Mäxmüt Mostafa häm küp sanda fälästinlelär qatnaştı.

 Gazzädäge ber restoranda oyıştırılğan başqa iftar aşında isä Gazzädäge Fälästin tışqı êşlär ministrı wäkile Gazi Xamad, êlemtä ministrı wäkile Sühäyl Mämdux häm Gazzä İslam universitetı rektorı Nasır Färxad qatnaştı. Anda Yunus Ämrä törek mädäniyäte üzäge mödire Özdämir belderü yasadı. “Törkiyädä uqığan yaqınça 500 fälästinle qardäşebez belän bergä möbaräk ramazan ayında Yordannıñ könbatış yarında häm Ğazzädä awız açabız,”-dide ul. Ul mädäni diplomatiya alıp barularına basım yasadı. “Bu geografiyada ike däwlät arasında duslıq ceplären köçäytüçe çara uzdıruıbızğa söyenäbez. Törkiyä universitetlarınıñ törle bülemnären tämamlağan fälästinlelär bügen Fälästin uqu yortları, xastaxanäläre şikelle däwlätneñ törle urınnarında ähämiyätle êş başqara,”-dip söyläde Furkan Özdämir.