Törek ağımı qaydan ütäçäk

Rusiyä ilbaşı Vladimir Putin Törek ağımı gazütkärgeçe proyıktınıñ Awrupağa suzılaçaq yünäleşeneñ marşrutı turında Törkiyä belän daimi räweştä fiker alışuların belderde. Bu xaqta ul Bolgariya xökümäte räise Boyko Borisov belän oçraşudan soñ oyıştırılğan matbuğat kiñäşmäsendä söyläde. Çönki Bolgariya - gazütkärgeç uzaçaq illärneñ berse bulırğa mömkin. Putin beldergänçä, Törkiyä ilbaşı Räcäp Tayyip Ärdoğan da telefon aşa söyläşüdä monı raslağan. “Törek häm bolğar xezmättäşlärebez belän bu yünäleştä êşçänlek alıp barabız,”-dide Putin.

Boyko Borisov ta ikençe yünäleşneñ Bolgariya aşa ütüen teläwlären belderde.  “Putin Törkiyä ilbaşı Ärdoğan belän söyläşüdä Törek ağımının Bolgariya aşa uzuı fikerenä berkemneñ dä qarşı kilmäwen äytte,”-dide ul.

Törek ağımı gazütkärgeçeneñ ike yünäleşe dä yılına 15,75är milliard kubometr gaz cibärü köçenä iyä bulaçaq. Ul Rusiyä zäñgär yağulığın Törkiyägä häm Awrupağa iltäçäk. İkençe yünäleşne ütkärü öçen Greśiya yäki Bolgariya saylanaçaq.