Ärdoğan: "Bu genośidnı yasawçılar häm aña yul quyuçılarğa läğ’nät yawsın"

“Bu genośidnı yasawçılar häm aña yul quyuçılarğa läğ’nät yawsın,”-dide Törkiyä ilbaşı Räcäp Tayyip Ärdoğan. Ul İzrail’neñ fälästinlelärgä zolım kürsätüen tänqıyt’li.

Räsmi säfär belän Angliyağa kitkän ilbaşı monda törek studentları belän oçraştı. Üz çığışında ul AQŞ ilçelegeneñ Qudüskä küçenüe waqıtında distälärçä fälästinleneñ İzrail’ xärbiläre tarafınnan şähit itelüenä reakśiyäsen kürsätte. “İzrail’ däwläte terrorçılıq belän şöğıl’länä. İzrail’ – terrorçı däwlät,”-dip belderde Ärdoğan. Ul Törkiyäneñ fälästinle qardäşlärgä teläktäşlek kürsätüdä qararlılığın assızıqladı. İlbaşı İzrail’ höcümnärendä Gazzädä hälaq buluçılarğa Allaxtan räxmät, yaralılarnıñ isä tizräk ayaqqa basuların teläde. Ul yaralılarnıñ 2 meñ 500 tiräse buluın, aralarında reanimaśiyada yatuçılarnıñ şaqtıy ikänen häm töbäkkä daru iltep citkerüdä qıyınlıqlar tuuın söyläde.

“Min bu keşelek faciğasenä kem säbäpçe bulsa da, Amerikamı, İzrail’me, läğ’nätlim häm moña däşmiçä qaluçılarğa da läğ’nät yawsın,-di Ärdoğan.- İlebezgä säfär belän kilep bezneñ belän oçraşuda terrorçılıq belän köräşüebez säbäple üterelgän terrorçılarnıñ xisabın sorawçılar xäzerge waqıtta üz cirlären basıp aluçılarğa qarşı läm-mim”.   

Ärdoğan Amerikanıñ Süriyädä terrorçı oyışmalar belän niçek xezmättäşlek itsä, monda da İzrail’ belän êşçänlek alıp baruın assızıqladı. “İzrail’neñ bu ğamälläre genośid häm bu genośid bügen genä êşlänmi. Bu basıp alu 1948nçe yıldan birle däwam itä. Fälästin keçkenäyä-keçkenäyä uç töbe qadär cirdä qaldı. Xäzer isä annan da çığarıp atu maqsatı belän yanalar. Qanunsız bu qararğa qarşı üz demokratik xaqların qullanğan grajdannarğa höcümnär İzrail’neñ qurqınıç yözen kürsätte”,-dip söyläde ilbaşı.   

Ärdoğan höcüm xäbäre artınnan  xökümät räise Binali Yıldırım häm başqa mönäsäbätle zatlar belän söyläşülär ütkärüen telgä aldı.

“Kinäşülär näticäsendä bu däxşätkä qarşı mönäsäbätebezne açıq kürsätü öçen Törkiyä isemennän qayber qararlar çığardıq. Fälästinle qardäşlärebezgä teläktäşlek yözennän ildä 3 kön milli matäm iğ’lan ittek. Monnan tış, İslam xezmättäşlege oyışmasın da ğadättän tış cıyılışqa çaqırabız”,-dide ilbaşı.  
Törkiyä BMO gomum assambleyasın da aşığıç räweştä cıyılırğa çaqırdı. Şulay uq, ilneñ Böyek Millät Mäclesendä dä maxsus könüzäk mäs’älä utırışı uzaçaq. Monnan tış törle şähärlärdä fälästinlelärgä teläktäşlek mitingları bulaçaq. Törkiyä İslam xezmättäşlek oyışmasınıñ çor citäkçese. Aña kerüçe illär belän bergäläp Ramazan ayı buyınça Fälästingä yärdäm kampaniyäse baraçaq.   

Ärdoğan Qızılay oyışmasınıñ bügen Gazzädä xastaxanälärgä yärdäm iltep citkerä başlawın, şulay uq, yaralılarnı annan çığaru öçen êş başlanuın belderde.