Törkiyäneñ AQŞnıñ İran qararına reakśiyäse

Törkiyä tışqı êşlär ministrlığınnan yasalğan belderüdä Törkiyäneñ İrannıñ atom-töş programmasına qağılışlı çişeleşneñ berdänber yulınıñ diplomatiya häm söyläşülär buluın härwaqıt yaqlap kilüenä häm uzğan çaqlarda da şuşı qısada tığız tırışlıq sarıf itüenä basım yasaldı.

2015nçe yılda qabul itelgän Kiñ qırlı urtaq ğamäl planınıñ atom-töş qorallarınıñ cäyelüen totqarlaw ölkäsendä yasalğan möhim adım buluı assızıqlanğan belderüdä: "Telgä alınğan şuşı plan xätta iñ awır mäs’älälärneñ dä söyläşülär belän xäl itelä alınaçağın kürsätte”, - dip äytelde.

Qarar säyäsi dairälärdä dä yañğıraş taptı.

İlbaşı idaräse süzçese İbrahim Qalın qararnıñ totrıqsızlıq häm yaña qarşılıqlar tudıraçağın belderde.

Mäs’äläne sośial’ mediadan bäyäläwçe Qalın, Törkiyäneñ atom-töş qorallarınıñ här törenä qarşı täwäkkäl totışın däwam itteräçägenä basım yasap: "İran belän atom-töş kileşüe qul quyğan başqa illär belän däwam itäçäk”, - dip äytte.

Törkiyä iq’tisad ministrlığı da İran belän säwdäneñ çikländerelmäyäçägen belderde.

Törkiyäneñ Awrupa Berlegennän cawaplı ministrı häm baş söyläşüçe Ömär Çälik isä Amerika Quşma Ştatlarınıñ İran belän atom-töş kileşüennän çigenü qararınıñ bik naçar täräqqiyätlärğä säbäp bulaçaq torışqa iyä buluın belderep, êşläwçe bu kileşügä zıyan kiterelergä tırışıluınıñ bik yalğış buluın assızıqlap äytep uzdı.

Çälik räsmi “Twitter” xisabınnan yasağan belderüendä İrannıñ atom-töş êşçänlegenä qağılışlı kileşüneñ möhim nigez bulıp toruına häm Xalıqara atom ênergiyası agentlığınıñ İrannıñ kileşügä turı kiterep xäräkät itüen xisapları belän raslawına basım yasap: “Amerika Quşma Ştatlarınıñ kileşüdän çigenü qararına kilüe tağın da yaxşıraq küreneşkä xezmät itmäs”, - dip äytte.