Germaniyadağı süriyälelär Törkiyägä kire qayta

Germaniya xökümäteneñ ğailä berläşüen qatlawlaştıruınnan soñ süriyäle möhacirlärneñ qayberläre kire Törkiyägä qayta başladı. Nemeś mäğ’lümat çaralarınıñ xäbärlärenä kürä, bolar - “waqıtlıça saqlaw” statusı alğan sıyınuçılarnıñ xaqları çikle bulu säbäple ğailä äğ’zaların Germaniyägä kiterä almawçılar. Alar qaçaq yullar belän kire Törkiyägä kitärgä tırışa.

Älege möhacirlärneñ yulçılığın küzätüçe korrespondentlar keşe qaçıruçılar belän söyläşülärenä dä şahit bula. Ber qaçaqçı Törkiyägä här kön yaqınça 50 keşe iltüen häm alarnıñ kübeseneñ süriyäle buluın äytä.

Federal’ migraśiya häm möhacirlär idaräse mäğ’lümatlarına kürä, uzğan yıl yäşäw urının üzgärtkän 4 meñ süriyäleneñ yaña adresı bilgele tügel.

Germaniyadan Törkiyägä kire qaytqan möhacirlärneñ dä tögäl sanın belä almıylar. Alarnıñ cir öste yulı belän başqa illärgä kitkän buluı da bar.

BMO Möhacirlär êşe buyınça yuğarı komissariatı mondıy wäzğıyät’kä  Germaniyada ğailä saqlaw mäs’äläsenä citärlek iğ’tibar birelmäw säbäpçe buluın söyli.

Germaniya Yäşellär partiyäseneñ Möhacirlär säyäsäte süzçese Luiza Amtsberg xökümätneñ ğailä berläşüdä qıyınlıqlar tudıruın tänqıyt’läde. Ul Awrupa Berlegeneñ migraśiya krizisında Törkiyäneñ yögen azaltu öçen 2016nçı yılda kileşü tözüen xäterlätte. “Xäzer “waqıtlıça saqlaw” statusı alğan keşelär ğailäse belän qawışu öçen Germaniyadan Törkiyägä kitärgä mäcbür. Bu mäğ’näsezlek”,-di Luiza Amtsberg.