Ärdoğan - Putin söyläşüe

Törkiyӓ ilbaşı Ӓrdoğan Rusiyӓ dӓwlӓt başlığı Vladimir Putinnan Süriyӓneñ İdlib hӓm Guta töbӓklӓrenӓ oyıştırılğan höcümnӓrneñ tuqtatıluına öleş kertüen soradı.

İke lider kiçke sӓğatlӓrdӓ telefonnan söylӓşte.

Rusiyӓ tarafınıñ talӓbe belӓn ütkӓrelgӓn söylӓşüdӓ ike yaqlı mönӓsӓbӓtlӓr atom-töş xezmӓttӓşlegen dӓ üz êçenӓ alaçaq rӓweştӓ qaraldı, Süriyӓ krizisı töp kön tӓrtibe matdӓse buldı.

İlbaşı idarӓse çığanaqlarınnan alınğan mӓğlümatqa kürӓ söylӓşüdӓ Ӓrdoğan Dimӓşk rejimınıñ İdlibtӓ hӓm Könçığış Gutada tınıç xalıqqa qarata höcümnӓreneñ qısqa waqıtta tuqtatıluınıñ Astana barışı hӓm Soçi kongressınıñ uñışlı buluı cӓhatennӓn möhim buluın assızıqladı.

Aqqoyı atom-töş üzӓk stanśiyase hӓm Törekağımı proyektları belӓn ber rӓttӓn ênergetika ölkӓsendӓge qalğan xezmӓttӓşleklӓre dӓ quzğatılğan söylӓşüdӓ Ӓrdoğan hӓm Putin mönӓsӓbӓtlӓrne hӓr ölkӓdӓ üsterü mӓs’ӓlӓsendӓge tӓwӓkkӓlleklӓren qabatladı.

İke lider ayıruça Törkiyӓ hӓm Rusiyӓ arasındağı Yuğarı dӓrӓcӓle xezmӓttӓşlek şurası cıyılışı hӓm Soçi kongressı belӓn bӓyle bularaq fiker alıştı.

Rusiyӓ ilbaşı Putin isӓ söylӓşü belӓn bӓyle açıqlawında Rusiyӓneñ Süriyӓdӓge xӓrbi bazalarına soñğı könnӓrdӓge höcüm kereşülӓren xӓterlӓtep: “Bolarğa törek ğaskӓrilӓreneñ dӓ, Törkiyӓ citӓkçelegeneñ dӓ qatışı yuq. Bu höcümnӓrne kemnӓrneñ oyıştıruın belӓbez,” – dide.

Hmeymim bazasına keşesez hawa apparatları belӓn höcüm kereşüeneñ yaxşılap planlanuın assızıqlağan Putin maqsatnıñ isӓ Törkiyӓne dӓ kertep barlıq partnyerlar belӓn mönӓsӓbӓtlarne bozu buluın citkerde.