“Törkiyä - Azärbaycan duslığı töbäk öçen bik möhim”
Bu xaqta ike ilbaşınıň urtaq matbuğat oçraşuında citkerelde
Törkiyä ilbaşı Räcäp Tayyip Ärdoğan Azärbaycan säfäreneň ikençe könendä başqala Baqıda ilbaşı İlham Aliyev belän bergä urtaq matbuğat oçraşuı ütkärde.
Ärdoğan üz çığışında Baqı – Tbilisi – Kars timer yulınnan soň ênergiya liniyäseneň açıluı belän ike ilneň strategik cähättän ber-bersenä tağın da yaqınayaçağın citkerde.
İlbaşı Ärdoğan Azärbaycan gazın Törkiyä aşa Awrupağa iltäçäk Trans Anadolu tabiği gaz ütkärgeçe proyektı TANAPnıň qısqa waqıtta üz êşenä kereşäçägen belderde.
Azärbaycan ilbaşı İlham Aliyev Törkiyä – Azärbaycan duslığınıň töbäk öçen möhim faktor buluın häm totrıqlılıq täêmin itüçe rol’ başqaruın assızıqladı.
Aliyev dönya külämendä nığığan, köçäygän Törkiyäneň Azärbaycannıň köçen arttıruına basım yasap ”Törkiyädän xärbi êşlänmälär satıp alabız. İnvestiŝiyälärneň küläme dä artaçaq”dide.
Xalıqara arenada da ike ilneň härwaqıt ber-bersenä yaqlaw kürsätüen beldergän İham Aliyev, bügenge söyläşülärdä Ärdoğanğa Tawlı Qarabax problemasın çişü barışı xaqında mäğ’lümat birüen dä citkerde.
Azärbaycan ilbaşı İlham Aliyev problemanıň haman da çişelä almawın, Berläşkän Millätlär Oyışması iminlek şurasınıň bu xaqta 4 qararı buluın, bu qararlar nigezendä Ärmänstan armiyäseneň basıp alınğan cirlärne bernindi şartsız häm xäzer ük buşatırğa tiyeşlegen , fäqät’ bu qararlarnıň barı tik käğäz’dä genä qaluın , Ärmänstannıň bolarnı isäpkä almawın , bolarnıň üzlärenä qarata ikele standart säyäsäte buluına basım yasadı.
Aliyev:”Qayber wäzğiyät’lärdä Berläşkän Millätlär Oyışması iminlek şurası qararları berniçä kön êçendä ütälä. Bezgä kilgändä alar ütälmi. Tawlı Qarabax probleması xalıqara xoquq qağidäläre häm Azärbaycannıň cir bötenlege qısasında çişelergä tiyeş. Tarixi cirlärebezdä ikençe ärmän däwläte tözelügä mömkinlek birmäyäçäkbez”dide.
