Qıtayda Yunıs Ämrä, Törkiyädä Konfüśiy

Räsmi säfär programması qısalarında Qıtayda oyıştırılğan BMO Bötendönya turizm oyışmasınıñ 22nçe ğomum şura cıyılışında qatnaşu öçen Çıngdu şähärenä kilgän Törkiyä mädäniyät häm turizm ministrı Numan Kurtulmuş TRT Törkiyä teleradiokompaniyası belän “Anadolu” agentlığına açıqlawlar yasadı.

Kurtulmuş Qıtay oçraşuları waqıtında bu ilneñ turizm tarmağınıñ möhim wäkilläre häm Qıtayda êşçänlek alıp baruçı Törkiyä şirkätläreneñ wäkilläre belän ütkärelgän cıyılışlarnıñ näticäle uzuın häm şuşı cıyılışlarnıñ bilgele ber aralıqlar belän däwam iteläçägen belderde.

Pekin citäkçelegeneñ Törkiyäne strategik urtaq (partnyor) itep kürüen añlatuçı Kurtulmuş här ölkädäge mönäsäbätlärneñ dä üsterelüe öçen iskitkeç citdi niyät häm maqsat êçendä buluın belderde.

Qıtay ministrınıñ monnan aldağı köndäge ike yaqlı söyläşüendä: “Ni öçen Törkiyägä ike million turist kilmäsen?” – dip teläk belderüenä iğtibarnı yünältüçe Kurtulmuş: "Bu cıyılış bik näticäle buldı. İnşallah, näticä aluçı bertörkem adımnarnıñ yasaluına forsat bulır”, - dip assızıqlap äytep uzdı.

Ministr Kurtulmuş, ütkärelgän oçraşularnıñ Törkiyädä turizmnıñ üseş aluına häm Qıtay belän mädäniyät êşçänlegeneñ köçäyüenä citdi räweştä öleş kertäçägän kötülären belderep:

"Yunıs Ämrä institutınıñ açıluı öçen söyläşülär ütkärdek. İnşallah, qısqa waqıt êçendä Qıtayda Yunıs Ämrä institutınıñ açıluı mömkin bulaçaq. Şuşındıy uq räweştä alarnıñ da Konfüśiy institutınıñ Törkiyädä açıluı belän bäyle adımnarnı yasayaçaqbız. Xäzerge waqıtta qayber universitet üzäkläre belän êlemtäläre bar. Bu räweşle häm konferenśiya, häm dä qıtaylar belän bulğan söyläşülär faydalı êşçänlek buldı”, - dip äytte.

Kurtulmuş BMO Bötendönya turizm oyışması qısalarında illärneñ ministrları belän ike yaqlı söyläşülär bulaçağın häm bäyläneşle illär belän turizm ölkäsendä nindi adımnarnıñ yasalaçağınıñ qarap uzılaçağın belderde.

Törkiyä mädäniyät häm turizm ministrı Kurtulmuş Çıngdudağı oçraşuları qısalarında Azärbaycan mädäniyät häm turizm ministrı Äbülfäz Garaev belän küreşep söyläşäçäk.

Törkiyä 1975nçe yılda tözelgän BMO Bötendönya turizm oyışmasında qoruçı äğza bulıp tora.