Binali Yıldırım Ğiraqqa baraçaq

Törkiyä premyer-ministrı Binali Yıldırım 5-6nçı ğinwar könnärendä Ğiraqqa baraçaq.

Ministrlar kabinetı çığanaqlarınnan alınğan mäğlümatqa kürä Binali Yıldırım başta başqala Bagdatta Ğiraq premyerı Xäydär İbadi belän küreşep söyläşäçäk. Soñınnan da Ärbildä Ğiraq körd regional’ citäkçelek başlığı Mäsut Barzani belän söyläşü ütkäräçäk.

Soñğı tapqır 2014tä ul waqıttağı premyer-ministr bulğan Äxmät Dawıtoğlu Bagdat häm Ärbilgä säfär yasağan ide. Annan soñ dekabr’ ayında da İbadi Änkarağa kilgän ide.

Soñğı waqıtta Ğiraq häm Törkiyä arasındağı Musul yanındağı Başika şähärçegendä bulğan törek ğaskäriläre belän ber rättän problemalarnıñ çişeleşe öçen ike yaqlı söyläşülär ütkärelde. 2016nçı yılnıñ may ayında isä Ğiraq 5 aydan soñ Änkarağa tulı wäqalätle ilçe bilgeläde.

Läkin üktäbr’ ayında isä krizis qabat kilep çıqtı. 1nçe üktäbrdä cıyılğan Törkiyä Böyek Millät Mäclese Ğiraq häm Süriyägä çik aryağında operaśiya mäs’äläsendä xökümätkä birelgän wäqalätne 2017çe yılğa qadär ozınayttı.

Başikadağı Törek qorallı köçläreneñ bar buluına qarşı çıqqan Ğiraq Parlamentı isä 5nçe üktäbr’ könne törek ğaskäriyeneñ ildän kitüen, Başika şähärçegen buşatuın soradı.

Monıñ belän bäyle beldergedän soñ da mönäsäbätlär qabat kiyerenke xälgä kilde.