İlbaşı Ärdoğan: “Belgiyanı kisätkän idek”

Ärdoğan: "Bu keşe belän bäyle bularaq Belgiya räsmilären kisätkän idek, läkin terrorçılıq belän bäyläneşen bilgeli almadılar", - dip äytte.

İlbaşı Ärdoğan: "Bryusseldä höcümçelärneñ berse 2015nçe yılnıñ iyün ayında Gaziantäptä qulğa alınıp, ildän çığarılıp cibärelgän keşeder. Deportatsiyäläwne 14nçe iyüldä nota belän Belgiya ilçelegenä belderdek. Belgiyalılar telgä alınğan keşene irekkä cibärde. Bu keşeneñ çit il terror suğışçısı buluına qağılışlı kisätüebezgä qaramastan Belgiya terrorçılıq belän bäyläneşen bilgeli almadı. Xätta höcümçene üz teläge nigezendä Niderlandqa qaytardıq. Nota belän Niderlandqa da mäğlümat birdek. İlebezneñ sizgerlege cähätennän dä monı ayıruça assızıqlap äytep uzam", - dip belderde.

Bryusseldäge höcümnän soñ bayraqların yartılay töşergän qayber illärneñ Törkiyädäge waqiğalar aldında şul uq sizgerlekne kürsätmäwen assızıqlawçı Törkiyä ilbaşı terrorçılıqqa qarşı urtaq totış kürsätelgän çaqta ilenä qarap möğamälä kürsätelmäw zarurlığına basım yasadı.

Törkiyäneñ könyaq-könçığışında terror oyışmasına qarşı alıp barılğan operatsiyälär belän bäyle bularaq törle näsixatlar birergä teläwçelärneñ buluına iğtibarnı yünältüçe İlbaşı Ärdoğan: “Terrorçılıq bulğan bu illärdä operatsiyälärneñ bulmawı mömkinme? Dönyada böten illär mondıy operatsiyalarnı ütkärä", - dip äytte.

Dönya säyäsäte ittifaq räweşendä xäl itkän oçraqta terrorçılıqnıñ beterelä alınaçağına basım yasawçı Ärdoğan: "Monıñ öçen dönya terrorğa, terrorçığa häm terrorçılıqqa yañadan bilgelämä birergä tiyeş", - dip assızıqladı.

Şul arada Belgiya Törkiyä qaytarğan terrorçı turında belderü yasadı.

Belgiya ğädälät ministrı Kun Heyns VRT däwlät teleradiokompaniyäsenä yasağan açıqlawında İbrahim Äl Bakravineñ Törkiyädä qulğa alınuın häm Niderlandqa cibärelüen belderde.

Belgiya ministrı terrorçılıq belän bäyläneşe bulmağan cinayättän törmädä utırğan Bakravineñ şartlı bularaq azat itelüen häm ul çaqta terror bäyläneşeneñ belenmäwen assızıqladı.

Niderland ğädälät ministrlığı da mäs'äläneñ tikşerelüen belderde.

Törkiyä tışqı eşlär ministrlığı çığanaqları da Ärdoğan telgä alğan keşeneñ Belgiyadağı intixar höcümendä ülgän İbrahim Äl Bakravi buluın beldergän ide.