"Törkiyäneñ iminlege satulaşılmas"

İlbaşı sarayı süzçese İbrahim Kalın Törkiyäneñ milli iminlegeneñ söyläşü häm satulaşu mäs'äläse bulmawın äytte.

İlbaşı sarayı süzçese Süriyädä bu tönne başlanaçaq utnı tuqtatuğa qaramastan höcümnärneñ däwam itüeneñ borçu tudıruın belderde.

İlbaşı sarayında matbuğat oçraşuı oyıştırğan Kalın Törkiyäneñ kiräkle oçraqlarda angajement qağidälären ütiyäçägen citkerep: “Törkiyäneñ milli iminlegenä yanawçı oçraqlarda Süriyäneñ qaysı yağınnan kilsä dä, “DAEŞ" terror oyışması yäisä YPG-PYDdan kilsä dä, Törkiyä xalıqara xoquqqa bäyle xoquqların qullanır, angajement qağidälären ütär," – dide.

PYD häm Äsäd rejimı arasındağı mönäsäbätne kürergä telämäwçelärneñ buluına işarät itkän Kalın: “Äle kiçä genä kördlärne izüçe rejim bügenge köndä alarnı üz pıçraq uyınına kertä," – dide.

Süriyädä ğamälgä kerüe planlanğan utnı tuqtatu qararın Törkiyäneñ xuplawın citkergän Kalın bu etapka ireşüdä Änkaranın da aktiv rol uynawın äytte.

Utnı tuqtatunıñ kiläçäge belän bäyle borçularnıñ buluın beldergän Kalın tübändägeçä däwam itte: “Rusiyä oçqıçlarınıñ bombağa totuı, Äsäd köçläre höcümnäreneñ däwam itüe utnı tuqtatunıñ kiläçäge mäs'äläsendä bezne borçuğa sala. Bolar tuqtamağan sayın qaçaqlar krizisınıñ tağın da tiränäyüennän berkem dä şiklänmäsen," – dide.