Aşlıq kileşüeneñ ähämiyäte

“Ukraina portlarında kötüçe 25 million tonnadan artıq aşlıqnı isän-imin häm, iñ ähämiyätlese, qısqa waqıt êçendä ixtiyacı bulğan illärgä iltü öçen diñgezdä koridor buldıru zarurlığı tudı,”-dip söyli Törkiyä milli saqlanu ministrı Xulusi Akar.

 Törkiyä, Rusiyä, Ukraina häm BMO arasında 22nçe iyül'dä İstanbulda imzalanğan häm Törkiyä aradaşçılıq itkän tarixi kileşü belän bergä, Ukraina tovarların çığarunı täêmin itü maqsatınnan, İstanbulda urtaq koordinaśiyä üzäge açıldı. Xulusi Akar äytkänçä, ul Ukrainadan aşlıq importın qabat başlaw, portlardağı kerü-çığularnı kontrol' itü häm taşu marşrutlarındağı iminlekne saqlaw öçen oyıştırıldı.

Rusiyä häm Ukraina dön'yadağı iñ zur aşlıq êksportçıları. Bu ike däwlät dön'yadağı boday ixtiyacınıñ 30%ın qanäğat'länderä. Tik Mäskäw Ukrainadağı "maxsus operaśiyä"sen başlağaç Ukrainanıñ ähämiyätle Odessa portın bloklağan bulıp çıqtı häm millionnarça tonna aşlıq tutırğan bik küp korab çığa almıyça qaldı. Azıq-tölek probleması çigüçe Paqıstan, Livan häm Yämän şikelle däwlätlär Ukrainanıñ aşlığına moxtac. Tik aşlıq täêminatınıñ kirtälänüe bäyälärneñ kisäk artuına kiterde häm dön'yada yaqınça 50 million keşe "kisken açlıq" qoçağına atıldı.

Küptän tügel tözelgän êksport kileşüe Kiyevnıñ 20 million tonna aşlığın dön'ya bazarlarına çığaru mömkinlege biräçäk. Boday bäyäläre aşlıq kileşüe imzalanğannan soñ kisäk töşä başladı. Aşlıq zapasın irekkä çığaru bigräk tä üsep kilüçe illär öçen faydalı.