"Törkiyä ğayepsez keşelärne maqsat itep aluçı härtörle höcümgä qarşı"

Törkiyä tınıç xalıqnı maqsat itep alğan härtörle höcümgä qarşı buluın belderde.

Tışqı êşlär ministrlığı Ğıyraqnıñ Dohuk vilayäteneñ Zaho rayonında ber yılğa yanında çınğa aşırılğan häm berençe mäğlümatlarğa kürä 8 keşe yaqtı dön’yadan kitkän, 23 keşe dä yaralanğan höcüm xaqında açıqlaw yasadı.

Açıqlawda bolay diyelä: “Bu höcümdä ğomere özelüçelärgä Allaxı Täğalädän yarlıqaw telibez, yaqınnarı belän dus häm qardäş Ğıyraq xalqı häm xökümäteneñ qayğısın urtaqlaşabız. Yaralanuçılarğa şifa telibez. Törkiyä ğayepsez keşelärne maqsat itep aluçı härtörle höcümgä qarşı.”

Törkiyäneñ tışqı êşlär ministrı Mäwlüt Çavuşoğlu da: “Törek qorallı köçlärebezdän alınğan mäğlümata kürä tınıç xalıqqa qarata höcümebez bulmadı,” – dide.

TRT Xäbär kanalına qunaq bulğan Çavuşoğlu biredä açıqlaw yasap, Törkiyäneñ berqayçan da tınıç xalıqqa qarata höcüm oyıştırmawın äytte.

“Bez terrorçılıqqa qarşı köräşebezne xalıqara xoquqqa yaraqlı räweştä alıp barabız. Bezneñ maqsatıbızda Süriyädäge terror oyışmaları bar. Ğıyraqta da bügengä qadär gel terror oyışmalarına höcüm ittek. Bu xain höcüm näticäsendä Ğıyraq xökümäte belän xezmättäşlek başqara alaçağıbıznı da açıqladıq. Tağın ber tapqır assızıqlarğa telim. Törkiyägä qarata ğayepläwlärne kire qağabız,” – dide ministr.