Finlyandiyä häm Şveśiyäneñ NATOğa kerüe ozaqqa suzılaçaq

Finlyandiyä häm Şveśiyäneñ NATOğa kerüe tiz genä bulmasqa mömkin. Bu xaqta ittifaq’nıñ ğomum särqatibe Yens Stoltenberg “Politico” xäbär säxifäsenä birgän interv’yusında söyläde.  Anıñ äytüençä, ike däwlätneñ NATOğa kerü öçen möräcäğat’läre nisbätennän Törkiyäneñ borçuların beterü öçen êşçänlek bara, tik moña waqıt kiräk.

Yens Stoltenberg ittifaq’ êçendä törle qaraşlarnıñ yañalıq tügellegen, küp tapqırlar küzätelüen belderde. Misal bularaq, ul 1950nçe yıllardağı Süäêş krizisın, 1960larda Franśiyäneñ NATO xärbi qanatınnan ayırıluın, 1970nçe yıllarda Afrika häm V’yetnamdağı suğışlarnı, soñraq Ğıyraq suğışında berlektäşlär arasındağı qarşılıqlarnı äytte.

“Bu şaqqatqıç tügel, çönki bez törle säyäsi partiyälär xakimiyättä bulğan, törle tarixlarğa iyä, törle kiñleklärdäge 30 däwlät,”-dide Stoltenberg. Ul, barlıq ayırmalarğa qaramastan, berlektäşlärneñ töp mäs’älä bulğan ber-berlären yaqlawda kileşülären assızıqladı.

“Finlyandiyä häm Şveśiyä mäs’äläsendä dä kileşüebezgä ışanam. Tik êşlänergä tiyeşle närsä - berlektäşlärneñ, Törkiyä beldergän şikelle, fiker qapma-qarşılığı häm borçuların utırıp söyläşü. Törkiyäneñ terrorçı höcümnärennän iñ nıq zarar kürgän däwlät häm NATO berlektäşe buluın qabul itüebez kiräk. Törkiyä - Ğıyraq häm Süriyä belän çige bulğan bik zur ähämiyätkä iyä il. Terrorçılıq belän köräştä zur rol’ uynadı häm uynıy.  Şul uq waqıtta Qara diñgez regionı däwläte bularaq ta möhim. Mäsälän, xäzer Ukrainadan aşlıqlarnı çığaru öçen ähämiyätle êşlär başqara. Törkiyä üz borçuların belderde häm, älbättä, bolarnı söyläşep beterergä tırışaçaqbız,”-dip söyläde NATO başlığı.

Stoltenberg ittifaq’ êçendä qararlarnıñ 30 äğ’za-däwlätneñ konsensusı belän çığarıluın xäterlätte häm ike ilneñ tiz arada NATOğa kerüen maqsat itep quyuların belderde. “Monı garantiyäli almıym, tik maqsatım bu. Kerü prośessına qarağanda, barlıq berlektäşlärneñ ber ük noqtadan başlamawın isäpkä alırğa kiräk. Kileşü häm urtaq nigez tabu kiräk,”-dide ul.