"Qara diñgezdäge aşlıq koridorı planın Törkiyä maqsatqa yaraşlı dip uylıy"

Törkiyä tışqı êşlär ministrı Mävlüt Çavuşoğlu Änkarada Rusiya tışqı êşlär ministrı Sergey Lavrov belän küreşep söyläşkännän soñ ütkärelgän matbuğat oçraşuında çığış yasadı.

Çavuşoğlu Lavrov belän Ukraina häm Rusiyadän dön’yağa êksportlanırğa tiyeşle produktlar aldındağı kirtälär xaqında söyläşülären, Ukraina aşlığın xalıqara bazarğa êksportlaw öçen törle fikerlär barlıqqa kilüen häm Berläşkan Millätlär Oyışmasınıñ bu mäs’älädä planı barlığın äytte.

Çavuşoğlu planğa qağılışlı bolay dide: “Bez BMO, Rusiya, Ukraina häm Törkiyä arasında buldırıla torğan mexanizmnı häm xezmattäşlekne üz êçenä alğan plan turında söyläşäbez. Moña köymälärne tikşerü dä  (aşlıq koridorı öçen) kerä. Törkiyä bularaq bez bu plannı maqsatqa yaraşlı dip uylıybız häm anı tormışqa aşırırlıq plan itep küräbez. Bu plannı Rusiya häm Ukraina qabul itärgä tiyeş. Bez BMO täq’dime belän bu xaqta centekläp söyläşü öçen İstanbulda oçraşu uzdıra aluıbıznı äyttek”.

Törkiyä tışqı êşlär ministrı Çavuşoğlu Rusiya belän Ukraina arasında söyläşülärgä kire qaytu öçen berniçä atna êlekkegä qarağanda uñay atmosfera buluın belderde.  

Ul Süriyäneñ tön’yağına mömkin bulğan operaśiya xaqında “Süriyäneñ cir bötenlegenä qurqınıç tudıruçı häm bezgä yanawçı terror oyışmalarınnan il arınırğa tiyeş” dide.

Rusiya tışqı êşlär ministrı Sergey Lavrov Qara diñgez koridorı xaqında  “Bez törek  duslarıbıznıñ tırışlığına zur ähämiyät biräbez. Bu bik möhim. Ägär Ukraina minadan arındıruğa äzer ikän, bez äzer” dip belderde.  

Rusiya ministrı:” Bez Törkiyäneñ Süriyä çiklärendä çit il köçläre tudırğan qurqınıçlarğa qarata sizgerlegen, borçıluların isäpkä alabız. Amerika Quşma Ştatları Süriyädä qanunsız räweştä qayber oyışmalarğa yärdäm itä”,- dide.