Ärdoğan: “Qazaqstan belän küperne köçäytep yulıbızğa däwam itäçäkbez”

İlbaşı Ärdoğan räsmi säfär belän başqala Änkarağa kilgän Qazaqstan Däwlät başlığı Qasım Cömärt Toqayıv belän berniçä kileşügä qul quyu tantanasınnan soň urtaq matbuğat oçraşuın oyıştırdı.

İlbaşı Ärdoğan biredä yasağan çığışında, bıyıl Qazaqstan belän diplomatik mönäsäbätlär urnaştırunıň 30 yıllığı buluın xäterlätep: "Xörmätle Toqayevneň yaňa Qazaqstannı formalaştırudağı tırışuları maqtawğa layıq”, - dip äytte.

"Barlıq şartlarda da Qazaqstanlı qardäşlärebez belän bergä bulaçaqbız. Bez borınğıdan tözelgän küperne köçäytep yulıbızğa däwam itäçäkbez,” – dip basım yasawçı Ärdoğan: “Törkiyä-Qazaqstan säwdä küläme 58%qa artıp, 5 milliard 300 million dollarnı uzdı. İnşallah, bez bergä yasayaçaq adımnar belän 10 milliard dollar maqsatına ireşerbez”, - dip belderde.

Törkiyä Däwlät başlığı Qazaqstan belän Törki däwlätlär oyışması belän ber rättän Berläşkän Millätlär Oyışması, İslam xezmättäşlek oyışması häm İq’tisadi xezmättäşlek oyışması kebek platformalarda teläktäşlekne däwam itterü täwäkkällegen raslawların da iskärtep uzdı.

Ärdoğan: “Yaqınça 19 million xalıq sanına iyä Qazaqstan belän 85 million xalıq sanına iyä Törkiyäneň teläktäşlegeneň ni qadär möhim bulaçağın aňlıysız”, - dide.

Qunaq Däwlät başlığı Toqayıv isä: “Törkiyä İlbaşı, qardäşem Räcäp Tayyip Ärdoğanğa izge Anadolu cirlärenä räsmi çaqıruı öçen min bik şat. Bez bügen bik möhim şaqtıy mäs’älädä kiň qırlı söyläşülär ütkärdek. İlbaşı xörmätle Ärdoğan belemle häm xörmätle säyäsätçe. Şuňa kürä fikerläre bik qıymmätle”, - dip süzlärenä başladı.

“Qazaqstan häm Törkiyä urtaq tamırlarğa iyä qardäş häm dus däwlät”, - dip äytüçe Toqayıv: “Törkiyädän bernindi zarar kilmäde, härwaqıt yaxşılıq kürdek. Bügengä qadär şuşılay buldı häm monnan soň da şuşılay bulaçaq”, - dip belderde.