Timmermans: “Törkiyä belän “yäşel üzgäreş” urtaqlığı bik möhim”

Timmermans başqala Änkaradağı räsmi oçraşularına qağılışlı bularaq “Twitter” akkauntınnan yazma belän urtaqlaştı.

Törkiyä moxitnı saqlaw, şähär tözeleşe häm klimat üzgäreşläre ministrı Murat Kurumğa näticäle uzğan Awrupa Berlege-Törkiyä arasında yuğarı däräcäle klimat dialogınıñ ikençese öçen räxmät äytüçe Timmermans: "Adaptaśiyanı arttırırğa, global’ cılınunı 1,5 gradus belän çikläw maqsatın saqlap qalırğa, ber-berebez belän häm töbäk belän xezmättäşlegebezne köçäytergä tiyışbez. Törkiyäneñ Milli öleş bäyannamäsen COP27 (2022nçe yılnıñ 8-18nçe noyabr könnärendä Misırnıñ Şarm Äl-Şäyex qalasında uzaçaq 27nçe BMO klimat üzgäreşläre konferenśiyası) aldınnan yañartu yöklämäse öçen min bik räxmätle”, - dide.

Timmermans ayıruça Säwdä ministrı Mäxmät Muş belän dä küreşep söyläşkäne öçen şat buluın belderep: "İq’tisadlarıbıznıñ “yäşel üzgäreşe” öçen yaqın urtaqlar bulu xäzer härwaqıttağısınnan tağın da möhim. Törkiyäneñ 2053nçe yılda “klimat neytral’”gä küçüne tizlätü öçen yasayaçaq adımnarnı sabırsızlıq belän kötäbez”, - dip bäyäläw yasadı.

Çärşämbe könne Tışqı êşlär ministrı Mäwlüt Çavuşoğlu belän oçraşqan Timmermans: "Minem yaxşı iptäşem Mäwlüt Çavuşoğlunı kürü iskitkeç ide”, - diyıp, Törkiyä-Awrupa Berlege mönäsäbätläreneñ ähämiyäte häm Urta diñgez, klimat üzgäreşläre häm tizlätelgän ênergiya üzgäreşe belän ber rättän törle mäs’älälärdä xezmättäşlek ölkäsendä kileşülären citkergän ide.

Timmermans ayıruça törek êş dönyası wäkilläre belän klimat häm ênergetika ölkäsendä êşläwçe kommerśiyäçel bulmağan oyışmalar belän söyläşülärdän täêsirlänüen, şuşı dairälärneñ üzgäreş, köndäşlek, säwdä häm üseş mäs’äläsendä xäbärdarlıqlarınıñ yuğarı buluın kürüen beldergän ide.

Awrupa Berlege-Törkiyä arasında Yuğarı däräcäle klimat dialogınıñ berençese 2021nçe yılnıñ 16nçı sentyabr’ könne Bryussel’dä ütkärelgän ide.