Törkiyä iñ küp ağaç utırtuçı illärneñ berse
Törkiyäneñ iñ küp ağaç utırtılğan illärdän berse buluı belderelde
BMO azıq-tölek häm igençelek oyışmasınıñ xezmättäşlegendä Törkiyä awıl xucalığı häm urman ministrlığınıñ Urman ğomum mödirlege oyıştırğan häm 21nçe-25nçe mart könnärendä Antaliyada uzuçı 7nçe Urta diñgez urman atnalığı häm 24nçe FAO SilvaMed komitetı utırışı açılış tantanası belän başlandı.
Tantanada qatnaşqan Urman ğomum mödire Bäkir Qaracabäy Törkiyäneñ iñ küp ağaç utırtılğan illärdän berse buluın belderde.
2019nçı yılda tağın da yäşelräk Törkiyä, yäşäw öçen tağın da kübräk yaraşlı dönya maqsatı belän 11nçe noyabr könen Milli ağaç utırtu köne itep iğlan itep, bu qısada "Kiläçäk sulışı" isemle yaña ağaç utırtu kampaniyasın başlatuların añlatuçı Qaracabäy:
"3 yıl däwam itüçe şuşı proyıkt qısalarında 2019nçı yılda ber urında ğına da 1 säğät êçendä 303 meñ 150 üsente utırtılıp rekord quyılğan ide. 2020nçe yılda da 21 meñ 825 kvadrat metrlıq mäydanda 452 meñ 23 üsente belän buldırılğan Törkiyä kartası figurası dönyanıñ iñ zur üsente mozaikası bularaq şulay uq Ginnes tarafınnan başqa ber rekord bularaq terkälde”, - dip äytte.
Qaracabäy: “Ağaç utırtu êşçänlegeneñ bilgese bularaq, üsente utırtqan keşelärne däräcäländerü maqsatınnan çığıp oyıştırılğan “üsente utırtqan keşelärneñ fotosürätlärennän torğan onlayn foto albom rekordı da Ginnes tarafınnan raslandı häm “Kiläçäk sulışı” proyıktınıñ öçençe rekordı bularaq terkälde”, - dip belderde.
