Ärdoğan: “İslamofobiya ağularğa däwam itä”
İlbaşı Räcäp Tayyip Ärdoğan: "İslamofobiya näq’ totqarlana alınmağan waba kizüe kebek bigräk tä Könbatış illärendä cäyelergä, uramdağı keşedän säyäsätçegä, êşçedän däwlät xezmätkärenä qadär cämğıyätneñ böten qatlamnarın ağularğa däwam itä”, - dip bäyäläde
Törkiyä mädäniyät häm turizm ministrlığı belän İlbaşı idaräseneñ êlemtä räislegeneñ yärdäme belän, Radio häm televideniye yuğarı şurası, Diyanät êşläre räislege, Ärciyäs universitetı häm Änkara belem universitetı oyıştırğan 2nçe Xalıqara media häm islamofobiya forumı başqalada Änkara säwdä palatasınıñ “Kongresium” üzägendä başlandı.
Ärdoğan forumğa cibärgän yullamasında:
"Cawapsız matbuğat organnarı da täşviq itkän näfrät atmosferası möselmannar belän bergä tele, dine, kilep çığışı häm mädäniyäte ayırmalı bulğan millionlağan keşegä dä tiskäre yoğıntı yasıy. Ukraina krizisı cähätennän yäşängän oyatsız bäxäslär İslam doşmanlığınıñ häm mädäni rasaçılıqnıñ qurqınıç yaqların açıp birä.
Cäberlängännärne ayırıp qarawnı hiç qabul itmibez. Artqan İslam doşmanlığı belän köräşneñ barı tik möselmannarnıñ ğına tügel, böten keşelek dönyasınıñ mäs’äläse buluına ışanabız. Başqa törle 2019nçı yılda Yaña Zelandiyada, 2021nçe yılda Kanadada yäşängän İslamofobik höcümnärne totqarlıy almıybız”, - dip äytte.
Ärdoğan, bu mäs’älädä Könbatış säyäsätçeläre, media organnarı häm däwlät oyışmaları belän bergä iñ zur cawaplılıqnıñ İslam dönyasında häm oyışmalarında buluına basım yasap: "Üzläre belän bergä yözlärçä million keşene nişan itep alğan bu xaqsızlıq, xoquqsızlıq häm diskriminaśiya aldında möselmannar köçle reakśiya kürsätergä, legal’ nigezdä xaq-xoquqların yaqlarğa, köräşergä tiyeş. 2nçe Xalıqara media forumın şuşı yünäleştä yasalğan qıymmätle adım bularaq küräm”, - dip äytte.
